Йæ ацы куыстыл ын æхсæнады минæвæрттæ уæлдай цин бакодтой
Ног æвæрæн Ирыстоны сфæлдыстады къæбицмæ. Рухс федта республикæйы зындгонд фыссæг Къибирты Амырханы фыст чиныг «Аргъæуттæ сабитæн дыгуронау». Йæ ацы куыстыл ын æхсæнады минæвæрттæ уæлдай цин бакодтой. Цæмæй, уый нын рагргом кæндзæн Сосранты Жаннæ. Уый не сфæлдыстадон къордимæ бабæрæг кодта чиныджы презентаци, æмæ йын ныхасы бар.
Къибирты Амырханы чиныг «Аргъæуттæ сабитæн дыгуронау», æмбæлы зæгъын, у иунæг рæвдауæндоны кары сабитæн аргъæутты чиныг. Йæ саразаг ыл афтæ биноныгæй бакуыста, æмæ йæ алы дзырд дæр у бынаты, сывæллонæн æнцон æмбарæн, уыцы хъуыддаг чиныджы презентацийы рæстæг алчи дæр бæрæг кодта.
Чиныг «Аргъæуттæ сабитæн дыгуронау» -ы презентаци арæзт æрцыд республикон наукон чиныгдоны. Бацархайдтой дзы Цæгат Ирыстоны районты минæвæрттæ, мадæлон æвзаджы фидæнмæ куыдфæндыйы цæстæй чи нæ кæсы, ахæмтæ.
Къибирты Амырханы ныхæстæм гæсгæ йæ цард афтæ лæмбынæгæй фыссынадимæ сбæтдзæн, уый йæм абон худæгау кæсы. Кæддæры ахуыргæнæг, республикон газетты кусæг, абон дæр хæссы йе вæрæн абоны, фидæны фæлтæртæн пайдайаг хъуыддæгтæ аразынмæ.
Иу хъуыды иннæмæ диссагдæр. Афæтæмæй, Амырхан цардмæ рахæссы йæ миддунейы монцтæ æмæ зæрдæхæлардзинады æнкъарæнтæ. Уæдæ, алы жанрты, йæ тæлмацгонд уацтæн та æвзагиртасджытæ, уæлдай аргъ кæнынц. Йæ куыстыты фæрцы Дыгурон Паддзахдон театры сценæйæ дыгуронау сдзырдтой бирæ фæсарæйнаг фысджыты уацмыстæ.
Презентацийы фæстæ йæ алы архайæгæн дæр лæваргонд æрцыд чиныг «Аргъæуттæ сабитæн дыгуронау». Кæстæрæй, хистæрæй ,се ппæт дæр æй райстой зæрдиагæй. Чиныг рухс кæй фæрцы федта – Санкт-Петербурджы ирыстойнаг интеллегенцийы минæвæртты ныхæстæм гæсгæ, ацы чиныг хъуамæ фæхæццæ уа республикæйы æппæт скъолатæм, рæвдауæндæттæм æмæ чиныгдонтæм.
