Рауагътой йæ культурон проект «Возрождение» æххæстгæнгæйæ. Ирон адæмы уарзондæр зарæггæнæджы æрымысыдысты йæ хиуæттæ, хорз æй чи зыдта, уыцы адæм, сфæлдыстадон интеллигенцийы минæвæрттæ.
Зæрдæмæ хъаргæ ныхæстæ, зæрдæйæ цæугæ музыкæ. Суанты Ким йæ алы зарæджы дæр йæ уды иу хай кæй бавæрдта, уый зындгонд у. Уымæн иу йæ алы уацмыс дæр уайтагъд ссардта фæндаг адæмы зæрдæтæм. Рухс цы аудиоальбом федта, уым æмбырдгонд æрцыдысты Суанты Кимы зарджытæ, ирон æмæ уырыссаг æвзæгтыл кæй акодта, уыдон. Адæмæн уарзон æмæ зындгонд цы зарджытæ сты, уыдон абон бирæтæ кæнынц, фæлæ Кимы бафæзмынын никæмæн бантыст. Ирон аивадуарзджытæ рагæй цы аудиоальбоммæ æнхъæлмæ кастысты, уый презентацимæ æрбацыдысты зарæггæнæджы хиуæттæ, йе `мкусджытæ æмæ æмбæлттæ.
Бæцæзаты Юрий, Уæрæсейы æмæ РЦИ-Аланийы адæмон артист: «Фылдæр уыдис камерон зарæггæнæг, уарзта уыдон æмæ уыцы хъуыддаджы тынг дæсны архайдта, уыдис музыкалон адæймаг, стæй йæ хъæлæс уыдис, адджын зæгъгæ куыд фæзæгъынц, ахæм. Зæрдæйæ куы нæ цæуа зард, уæд, уыцы зард ницы у, цыфæнды хъæлæс дын куы уа, уæддæр. Фæлæ уый зæрдæйæ зарыдис æмæ афтæ адæймаджы зæрдæйы иннæрдæм хызтис. Ахæм дæсны зарæггæнæг уыдис. Æмæ ахæмтæ бирæ нæй».
Аудиоальбом рауагътой культурон проект «Возрождение» æххæстгæнгæйæ. Йæ нысан у – ирон национ культурæйы бынтæ бахъахъхъæнын æмæ сæ парахат кæнын. Проект фæзындис Цæгат Ирыстоны фыццаг президент Галазты Æхсарбеджы хъуыдымæ гæсгæ. Æмæ йыл ныр кусынц фонд «Мир Кавказа», паддзахадон телерадиокомпани «Алани» æмæ рауагъдад «Перо и кисть». Презентацийы æрымысыдысты Суанты Кимы царды цымыдисаг цаутæ, кастысты æмдзæвгæтæ, зарыдысты йын йæ зарджытæ.
Цæгат Ирыстоны адæмон артист Суанты Ким стыр æвæрæн бахаста аивадмæ. Уыд ирон эстрадон зарæджы бындуæвæрæг. Уыцы хъуыддагыл архайгæйæ Кимы руаджы 1993-æм азы республикæйы арæзт æрцыд Национ эстрадон оркестр. Ныртæккæ хæссы Суанты Кимы ном, разамынд та йын дæтты Къæбойты Николай. Уым кусы Кимы чызг Суанты Альбинæ дæр.
Уæрæсейы сгуыхт артист Суанты Кимы рæсугъд хъæлæс азæлд Польшæйы, Германийы, Сирийы, Индонезийы, Японийы æмæ æндæр бæстæты. Æмæ-иу кæд адæм зарджыты ныхæстæ не `мбæрстой, уæддæр сын Ким сæ зæрдæтæ рухс кодта йæ уды хъармæй. Проект «Возрождение» ацы хъуыддаг дарддæр хæццæ кæны.
Проект æххæсгæнгæйæ рухс федтой 5 аудиоальбомы. Æлборты Феликсы мæ Гæздæнты Булаты уацмыстæ. Кæсæбиты Митяйы, Баллаты Валодяйы æмæ Суанты Кимы зарджытæ. Ныртæккæ та проекты сфæлдыстадон къорд архайы фыццаг ирон фæндырдзæгъдджыты æмæ кадæгæнджыты уацмыстæ рауадзыныл».
Гугкаты Иринæ
