Уыцы хъæппæрис разынд чырыстон дины гимназы педагогтæм
Рухстауæг Колыты Аксойы тыххæй мультипликацион ныв систой Дзæуджыхъæуы. Уыцы хъæппæрис разынд чырыстон дины гимназы педагогтæм. Царды та йæ рауагътой гимназы ахуырдзаутæ. Æхсæз минуты мультфильм дзурæг у сауджыны цардыл. Уæлдай æргом дзы аздæхтой, Кавказы чызджытæн фыццаг скъола саразыны хъæппæрисмæ. Проекты автортæ фæллой кодтой дыууæ азы. Ныртæккæ та йæ фæнд кæнынц ирон æвзагмæ ратæлмац кæнын. Хъатймазты Дзерассæ радзурдзæн бæстондæр.
Ахæм мультипликацион маги сусæггонд у лыстæг хъуыддæгты. Мультипликатор иу позици иннæйæ раивы, æмæ къоппыты чысыл фигурæтæ видеойы судæгас вæййынц. Æмæ мæнæ объективы Нарыхъæуы пейзажы бæсты фæзынд Колыты Аксо ирон чызджытæн ахуырады дунемæ фæндаг кæм байгом кодта, уыцы агъуыст. 9-æмкъласон Татьяна Хворостьяновайæн мультфильмыл куыст – фыццаг ахæм фæлтæрддзинад у. Рухстауæджы цард кадргай равдисын – цымыдисаг æмæ уыимæ бæрнон хъуыддаг у.
Колыты Аксойы тыххæй мультфильм у Чырыстон гимназы ахуыргæнджыты хъæппæрис, царды та йæ рауагътой йæ ахуырдзаутæ. Проектон-иртасæн æхсæнад «Кладезь»-æй лæппутæ æмæ чызджытæ ацы хъуыддагыл 2 азы бæрц архайдтой.
Цалынмæ нывгæнджытæ ныв кодтой, мультипликатортæ чысыл фигурæтæ кодтой, уæдмæ Тедеты Арсен ахуыр кодта чырыстон сауджыны цард. Æнæ ахæм æмархайдæй проект нæ рауадаид. Лæппу афтæ лæмбынæг бакуыста, æмæ йын цыма Колыты Аксойы биографийы æнæзонгæ хабæрттæ нæй, афтæ кæсы.
Чырыстон сауджыны тыххæй мультфильм цæуы 6 минуты. Проект у уникалон, фæлæ иунæг нæу. Чырыстон гимназы ахуырдзаутæ ма бацæттæ кодтой мультфильмтæ Нойы æмæ Зæдæлескы Нанайы тыххæй. Фæлæ сæрмагондæй ацы куыстыл бахардз кодтой æппæтæй фылдæр рæстæг. Хæстæгдæр рæстæг æй фæнд кæнынц ирон æвзагмæ ратæлмац кæнын.
Чырыстон гимназы ахуырдзаутæ ныридæгæн бавнæлдтой ног проектмæ. Ацы хатт темæтæ сты «Адæмты хæлардзинад» æмæ «Уæлахизы 80 азы».
