Сæ профессионалон бон сбæрæг кодтой хъæууон хæдзарады кусджытæ. Бызыккаты Феликсæн йæ сабибонтæй фæстæмæ зæххы куыст бауарзын кодтой йæ ныййарджытæ.
Æртын фондз азы Бызыккаты Феликс кусы Плиты Иссæйы номыл колхозы. Йæхæдæг куыд зæгъы, афтæмæй зæххы куыст бауарзта йæ сабибонтæй фæстæмæ. Дызæрдыг дæр никуы кодта, колхозы кæй кусдзæн, ууыл. Райдыдта хуымæтæг зæхкусæгæй. Ныр та у тракторон бригады сæргълæууæг.
Бызыккаты Феликс, Плиты Иссæйы номыл колхозы тракторон бригады сæргълæууæг «35 азы кусын колхозы. Æмæ мын ныртæккæ цыфæнды куы дзуриккой, уæддæр никуыдæм ацæуин. Нæ заводмæ, нæ æндæр кæдæмдæр. Уарзын мæ куыст. Сахуыр мæ кодтой мæ ныййарджытæ».
Алы бон дæр фæззыгон куыстыты рæстæг Бызыккаты Феликс йе мкусджытимæ рацæуы быдырмæ. Иу мин æмæ фондз сæдæ гектарыл фæллой кæнгæйæ коллектив кусы æнгомæй. Абон Плиты Иссæйы номыл колхоз хæссы йæ раздæры ном. Ома у паддзахадон. Æрæджы балхæдтой ног техникæ. Колхозонты хъуыдымæ гæсгæ, сын уый бантыст Феликсы фæрцы.
Къудухты Роман, Плиты Иссæйы номыл колхозы кусæг: «Феликс æмбары йе мкусджыты. Æмæ йæ уыдон дæр æмбарынц. Хорз разамонæг у».
Бригадир уæвгæйæ, Бызыккаты Феликс зоны ацы куысты сусæгдзинæдтæ. Разы у, цыфæнды рæстæг дæр æххуысмæ æрбацæуын. Бирæтæ ам Феликсы дæнцæгæн хæсгæйæ бауарзтой зæххы куыст.
Хъуыссæты Эльбрус, колхозы скълады кусæг: «Феликс бирæтæн бауарзын кодта колхозы куыст. Æз мæхæдæг ам бирæ азты кусын. Зæгъæн ис, æмæ Феликсмæ гæсгæ. Райдыдта хуымæтæг кусæгæй. Æмæ нын ныр разамынд дæтты. Колхозонтæ йын кæнынц стыр аргъ».
Колхозы коллектив сæ профессионалон бæрæгбон дæр æгуыст нæ уыдысты. Се ппæт дæр рацыдысты быдырмæ. Уæвгæ фæллойгæнæг адæм зонынц, сæ архайдæй бирæ аразгæ кæй у, уый. Сæ бинонтæн нæ, фæлæ республикæйы æппæт цæрджытæн дæр.
