Ууыл æрныхас кодтой республикæйы сæргълæууæг Битарты Вячеслав, Дзæуджыхъæуы администрацийы разамонæг Æлбегаты Барис, сæйраг архитектор Цæллагкаты Алыксандр æмæ генералон проекттæаразæг Олег Припутнев.
Сабырдзинады проеспекты раздæры кинотеатр «Октябрæй» Горькийы уынджы онг уаццаджы рацарæзт куыд цæуы, ууыл æрныхас кодтой республикæйы сæргълæууæг Битарты Вячеслав, Дзæуджыхъæуы администрацийы разамонæг Æлбегаты Барис, сæйраг архитектор Цæллагкаты Алыксандр æмæ генералон проекттæаразæг Олег Припутнев. Стыр æргом аздæхтой проспекты фистæгæйцæуджыты фæндаджы хайы рацарæзтмæ. Зæгъæм, равзарын хъæуы кæнæ грантиæй конд гыццыл, кæнæ стыр къæйдуртæ. Уымæй дарддæр нысан кæнынц уæлдæфыл цæуæг электрон тыхдæттæг телтæ зæххы бын ауадзын. Центрон парчы та Битарты Вячеслав йе ргом аздæхта сæйраг бацæуæны æддаг бакастмæ. Цæгат Ирыстоны сæргълæууæг загъта, кæй хъæуы историон хуыз бахъахъхъæнын. Уымæн æмæ у ивгъуыд æнусы 40-æм азты конструктивизмы ирд дæнцæг. Рацарæзтмæ æнхъæлмæ кæсынц, адæм Горбатый мост æмæ Ерофеевская беседкæ кæй хонынц, уыдон. Бæрæг нæма у парчы раздæры объекттæ – ресторан «Нар» æмæ сырддоны хъысмæт дæр. Уыдоны бæсты фæзындзæн сывæллæттæн ирхæфсæн фæз аттракционтимæ. Фонтаны цур ныссадздзысты ног бæлæстæ. Битарты Вячеслав ма сæвæрдта хæс чысыл бизнесы объекттæн бынæттæ снысан кæнын. Уыимæ хъуамæ парчы территорийы æддаг бакаст ма халой.
