Алы бæстæты профилон уæлдæр ахуыргæнæндæтты студенттæн фадат уыдзæн сæ зонындзинæдтæ пркатикон æгъдауæй равдисынæн
Нæ бæстæйы раздæр хъуыстгонд чи уыди, уыцы Садоны æрзæт, зды æмæ цинчы куыстуаты бындурыл рæхджы фæзындзæн тренировкæтæгæнæн ахуырадон центр. Алы бæстæты профилон уæлдæр ахуыргæнæндæтты студенттæн фадат уыдзæн сæ зонындзинæдтæ пркатикон æгъдауæй равдисынæн. Ирыстойнаг хохы куыстгæнджыты æмæ металлургты кой ныридæгæн дæр бирæ рæтты айхъуыст, æмæ цæттæ сты сæ фæлтæрддзинадыл кæстæрты æфтауынмæ..
Цæгат Кавказы хæххон металлургон институты рауагъдонтæ амæй фæстæмæ теорийæ дарддæр исдзысты практикон зонындзинæдтæ дæр. Хъуыстгонд дæрддзæф хъæу Галоны байгом уыдзæн ахуыргæнæн полигон хохы куыстгæнджытæн æмæ металлургтæн.
Институты зæгъынц, полигон уыдзæн ахуырадон. Куыстуаты хъомыс здахынмæ нæ хъавынц. Сæ сæйраг нысан у – студенттæн практикон зонындзинæдтæ радтын, æмæ сын афтæмæй фидæны куысты бынæттæ ссарынæн баххуыс кæнын. Куыстуат «Баспик»-ы цæттæ сты алывæрсыг æххуыс бакæнынмæ. Компани афтæмæй хъуыды кæны йæхи фидæныл æмæ ног кусджыты фæлтæрыл.
Практиканттæ æрбынат кæндзысты Садоны раздæры скъолайы бæстыхайы. Ныртæккæ дзы цæуынц цалцæггæнæн куыстытæ, æлхæнынц æмбæлгæ техникæ, хъæддзаума. Хæстæгдæр рæстæг баивдзысты рудзгуытæ. Чысыл хæххон хъæу Садон кæддæр хъуыстгонд уыд нæ бæстæйы алы рæтты. Ам кодтой æрзæты, зды æмæ цинчы куыст. Ныртæккæ та æрцыди заууатмæ. 2002-æм азы донивылды фæстæ цæрджытæ баззади æрмæстдæр сыхаг Галоны. Ныртæккæ дзы цæры 50 адæймаджы. Сентябры та ардæм æрбацæудзæн фыццаг арæзтадон отряд. Хæххон металлургон институты студенттæ сæхи къухтæй банывыл кæндзысты фидæны ахуырадон полигоны бæстыхай æмæ йæ алфамблай территори. Галоны цæрджыты уырны, ног центр поселокæн йæ раздæры кад кæй раздахдзæн, уый. Бынæттон администарцийы сæргълæууæг куыд радзырдта, афтæмæй цæрджытæ сæ ныфс дарынц, ногæй сæм куысты бынæттæ кæй фæзындзæн æмæ инфраструктурæ кæй рæздзæн, ууыл. Нысан кæнынц, алы мæй Галонмæ практикæмæ кæй цæудзысты 50 студенттæ. Уыимæ канд хæххон металлургон институты минæвæрттæ нæ, фæлæ ма Уæрæсейы æмæ фæсарæйнаг профилон техникон уæлдæр ахуыргæнæндæтты студенттæ дæр.
