Цæгат Ирыстоны волонтерты змæлд баиу кодта 16 мин адæймагæй фылдæры
Сæ нысан у дуне хуыздæр кæнын. Уæрæсейы сбæрæг кодтой бархионы бон. Цæгат Ирыстоны волонтерты змæлд баиу кодта 16 мин адæймагæй фылдæры. Æххуыс кæнынц пенсиисджытæн, æфснайынц æхсæнадон территоритæ, æххуыс кæнынц спортивон æмæ культурон мадзæлттæ аразыны æмæ сæ кæныны хъуыддаджы. Бирæтæ æххуыс кæнынц хæстонтæн сæрмагонд æфсæддон операцийы зонæйы. Бæлвырддæр радзурдзæн Хъайтмазты Дзерассæ.
Малиты Ермак у ирвæзынгæнджыты æппæтуæрæсеон студентон корпусы инструктор. Ацы змæлды ис 5 азы бæрц. Æххуыс кæнын райдыдта пандемияйы рæстæг. Куыд зæгъы, афтæмæй кæд зындзинæдтæ вæййы, уæддæр бæлвырд зоны, ацы куыст цæмæн кæны, æмæ йын уый дæтты тых.
Студенттæ-ирвæзынгæнджытæ ацæуынц сæрмагонд цæттæдзинад, цæмæй бахъуаджы рæстæг профилон службæтæн æмбæлгæ æххуыс бакæнын сæ бон уа, уый тыххæй. Мæй цалдæр хатты та ма кæй фæнды, уыдонæн арæзт фæцæуынц курсытæ фыццаг медицинон æххуыс кæнынæй.
Ирвæзынгæнджыты æппæтуæрæсеон студентон корпус Цæгат Ирыстоны кусы 2001-æм азæй фæстæмæ. Змæлд архайы Цæгат Кавказы хæххон-металлургон институты бындурыл, ныр та ма отряд ис 5-æм училищæйы дæр. Стыр бинонты хай суæвын у, 35 азы онг кæуыл цæуы, уыдонæй алкæмæндæр. Ирвæзынгæнджыты корпусы рæнхъæты ис 70 адæймаджы.
Ислам Дышеков та у волонтер-медик. Суанг скъоладзау уæвгæйæ дæр ахадгæйæ архайдта бархионты змæлды. Ныртæккæ у медицинон академийы 6-æм курсы студент. Кусы ма змæлды регионалон координаторæй. Волонтертæ-медиктæ сæдæгай сты. Исламы ныхæстæм гæсгæ, сæ рæнхъытæм бацæуын кæй фæнды, уыдон та ноджы фылдæр сты.
Волонтерты алыхуызон змæлдтæ иу кæнынц сæдæгай лæппуты æмæ чызджыты ресурсон центр «Кавказы Бархион»-ы. Цæгат Кавказы федералон зылды у фыццаг. Йæ сæйраг нысан у бархиондзинадæн æххуыс кæнын. Ам куыст цæуы æнæрлæугæйæ. Форумтæ, дæсныйадæвдисæг ахуыртæ, федералон æмæ республикон æмвæзады дзыллон мадзæлттæ цæттæ кæныны æххуыс. Центры командæйы хай суæвын у алкæйы бон дæр. Активисттæ цы алывæрсыг æххуыс кæнынц, уымæй фæстæмæ ма ам æххуыс кæнынц фæндтæ царды уадзын æмæ проекттæ аразын.
