Фæлладуадзæн сезон кæронмæ фæхæццæ кæны. Уыимæ сæ раздæры фæткмæ здæхынц транспорты æппæт хуызтæ. Зæгъæм, Дзæуджыхъæуы трамвайты системæ. Кæд сæ уавæртæ раздæрау хорз не сты, уæддæр техникон æркаст цæуынц æмбæлгæ уагыл. Сентябрьмæ цæттæ кæнынц скъолаты транспорт дæр. Фарон нæ республикæ райста 124 автобусы сæрмагондæй сывæллæтты ласынæн.
Хуыриаты Хъазыбег депойы кусы 1979-æм азæй фæстæмæ. Йæхæдæг куыд зæгъы, афтæмæй ма æрбаййæфта куыстуаты хуыздæр азтæ. Фæллойгæнджыты нымæц уыд дзæвгар фылдæр. Ныртæккæ та æдæппæтæй сты 6 адæймаджы.
Кæд æмæ кусаг къухтæ нæ фаг кæнынц, уæддæр трамвайтæн рæстæгæй-рæстæгмæ скæнынц техникон æркаст.
Депойы кусджытæ зæгъынц, сæ бæстыхай ис æдзæллаг уавæры. Ангарты сæртæй тæдзы. Уарынты фæстæ дон фæкалынц ведратæй. Уый та тæссаг у электрон тыхдæттæн телтæн.
Уæдæ скъолаты транспорт та цæттæ у эксплуатацимæ. Уæлдай цæстдард цæуы сывæллæтты æдасдзинадмæ. Алы ног ахуыры азы райдиан фæндæгтыл æдасæй цæуыны паддзахадон инспекцийы кусджытæ сбæрæг кæнынц, ахуырдзауты скъолатæм чи ласдзæн, уыцы транспорты уавæр.
Чи зоны æмæ хæстæгдæр рæстæг муниципалон транспорты ныффидар кæндзысты фæндаггаг фидыны ног системæ. Ома дзы æхца дæттын нал хъæудзæн, фæлæ пайда кæндзысты бæлццоны иумæйаг билетæй.
