Инспекцион къамис сын сбæрæг кодта сæ хæдзар, æмæ цы уавæрты цæрынц, уый
Сæ царæнуæтты уавæртæ фæхуыздæр кæныны тыххæй Дзæуджыхъæуы администрацимæ курдиатимæ бацыдысты Радченкоты хотæ. Инспекцион къамис сын сбæрæг кодта сæ хæдзар, æмæ цы уавæрты цæрынц, уый. Хатдзæгтæм гæсгæ, хаст æрцыди уынаффæ æвæстиатæй куыстытæ райдайыны тыххæй. Хæдзары кæронмæ фæхæццæ кæны хъармгæнæн системæйы монтаж. Подрядон организаци уадзы хъарм æмæ уазал доны хæтæлтæ. Хæстæдгдæр бонты сæвæрдзысты, электрон тых чи фæстауæрц кæндзæн, ахæм хъармгæнæн æмæ сантехникæ. Валентина Радченко у адæмон рухстауыны отличник, Цæгат Ирыстоны сгуыхт ахуыргæнæг, Пушкины номыл майданы хицау, фæллой кодта фронты фæсчъылдым. 55 азы йæ хъарутæ не вгъау кодта Фыдыбæстæйæн лæггад кæнынæй, уыимæ, куыд хæсты рæстæджы, афтæ уый фæстæ дæр. Декабры Валентинæйыл сæххæст уыдзæн 94 азы. Йæ гуырæнбоныл ацæргæ сылгоймаг ацы хатт сæмбæлдзæн хъарм ног цалцæггонд хæдзары.
