Афтæмæй адджын товары экспорт зынгæ фæфылдæр уыдзæн
Сæлдæг аразæг цæгатирыстойнаг куыстуат байгом 2004-æм азы. Йæ продукци дзуапп дæтты уæрæсейаг стандартты домæнтæн. Ныртæккæ куыстуат йæ продукци æрвиты нæ бæстæйы 19 регионмæ. Ныр та нысан кæны йæ хъомыс фæфылдæр кæнын, æмæ ног базарадмæ рацæуын. Афтæмæй адджын товары экспорт зынгæ фæфылдæр уыдзæн. Гуытъиаты Алинæ радзурдзæн бæлвырддæр хабæрттæ.
Куыстуат «Снежная королева» хъуыстгонд у, адджинæгтæ чи уарзы, уыдонæн. Ам аразынц сæлдæджы цалдæр хуызы — куыд хуымæтæг, афтæ эскимо дæр. Фæллой дзы кæнынц алыхуызон специалисттæ. Уыдон сæхи хонынц стыр командæйы хай. Алчидæр сæ æххæст кæны йæ размæ æвæрд нысантæ.
Продукцийы хуыз бæрæг кæны сæрмагонд адæймаг. Хъуамæ сæлдæг уа æнæхъæн, æнæ цъæлтæй. Кæд йæ æддаг бакаст нормæйæн дзуапп нæ дæтты, уæд нымад цæуы бракыл. Фæлæ специалисттæ куыд зæгъынц, афтæмæй брак арæх не рцæуы. Кусджытæ лæмбынæг кæсынц продукци æмæ ифтонгарзы уавæрмæ.
Алы ногдзинадæн дæр йæхи уидæгтæ ис. Куыстуаты пайда кæнынц италиаг станоктæй, фæлæ цалдæр линийæн сæрмагондæй балхæдтой советон замантæй чи баззад, ахæм ифтонгарз. Специалистты хъуыдымæ гæсгæ у зынгæ фидардæр. Брикет аразæн лини дæр советон дугæй баззад. Цæуы йыл æнусырдæгæй фылдæр. Куыстуаты разамынд куыд зæгъы, афтæмæй 70 азты ифтонгарз йæ фæсарæйнаг хуызæгтæй æвзæрдæр нæу. Куыстуаты ис цыппар цехы. Æртæйы дзы аразынц сæлдæг, иуы та аразынц хуыссæйæ агуывзæтæ. Фыцынц сæ сæрмагонд пецты иухуызон технологитæм гæсгæ.
Сæлдæджы хъацæнты хæрзхъæддзинадмæ кæсынц лæмбынæг. Куыстуат байгом 2004 азы æмæ уæдæй фæстæмæ пайда кæнынц сæрмагонд сусæг рецептурæйæ. Продукци дзуапп дæтты уæрæсейаг стандартты домæнтæн. Уыдон та сты советон домæнтæм хæстæг. Чи зоны æмæ уый тыххæй кæнынц стыр аргъ «Снежная королевайы» сæлдæгæн. Ныртæккæ куыстуат йæ продукци æрвиты нæ бæстæйы 19 регионмæ, Краснодары крайæ дард Сургутмæ. Дарддæр та архайынц сæ базарадон географи фæуæрæхдæр кæнын. Уæрæсейы экспорты центры фæрцы ирон сæлдæг бацагуырдтой Сомихы æмæ ма суанг Китайы дæр.
Куыстуаты зæрдæ æвæрынц, сæ бон суткæйы дæргъы æртын тоннæйы продукци уадзын кæй у, уымæй. Сæ авналæнтæ уый фаг сты. Уыйимæ ма ныр сæлдæджы афон дæр райдыдта. Ахæсдзæнис суанг апрельмæ.
