Ахуырады къабаз Станиславæн ног у
Сæрмагонд æфсæддон операцийы архайæг Дзгойты Станислав ныр мæйы бæрц ис Дзæуджыхъæуы бирæвæрсыг техникумы сæргъы. Ахуырады къабаз Станиславæн ног у. Фæлæ цыбыр рæстæгмæ ахадгæ куыст бакодта. Ног директоры архайдæй разы сты техникумы ахуыргæнджытæ æмæ студенттæ дæр. Бæлвырддæр хабæрттæ радзурдзæн Хъайтмазты Дзерассæ.
Хъæбатыр æфсæддонæй ахуыргæнæндоны зæрдæхæлар директормæ. Дзгойты Станислав ныр мæйæ фылдæр ис ног бынаты Дзæуджыхъæуы бирæвæрсыг техникумы. Куыд зæгъы, афтæмæй йын уый у стыр бæрнондзинад.
Ахуырадон къабазы Станислав фыццаг хатт ис. Æвзонг лæппуйæ ахуыр кодта мидхъуыддæгты министрады университеты, мидæфсæдты æфсæддон институты Санкт-Петербурджы. Йæ квалификаци бæрзонддæр кодта Уæрæсейы Президенты цур паддзахадон службæйы æмæ адæмон хæдзарады уæрæсейаг академийы программæ «Современное публичное управление»-мæ гæсгæ. Уыд разамонæг бынæтты мидхъуыддæгты министрады структурæты, арæзтадон æмæ транспортон къабæзты. Абон Дзгойты Станислав у Дзæуджыхъæуы минæвæртты Æмбырды депутат, фракци «Иугонд Уæрæсе»-йы уæнг. Сæрмагонд æфсæддон операцийы зонæмæ Станислав ацыд йæхи фæндонмæ гæсгæ. Йæ хæсыл банымадта Фыдыбæстæ хъахъхъæнын. Фронтæй ссыд афæдзы размæ, фæлæ йын ацы темæ раздæрау у ахсджиаг. Дзгойты Станислав фæсивæдæн цы патриотизмы уроктæ кодта, сæрмагондæй уыдоны фæрцы бахауд ахуырады къабазмæ.
Ныр Дзгойты Станиславы фæрцы бирæпрофилон техникумы алы æртыццæджы дæр арæзт цæуынц лæгдзинады уроктæ. Уый у æцæг традици – йæ нысан у æрыгон фæлтæры патриотизмыл ахуыр кæнын.
Ахуырадон-хъомылгæнæн процессы лæгдзинады уроктæ систы Дзгойты Станиславы директоры практикæйы фыццаг ногдзинад. Фæндты ис æндæр ногдзинæдтæ дæр. Зæгъæм, æрыгон специалистты ргом студенттимæ куыстмæ здахын, практикон ахуыртæн материалон-техникон бындур хъæздыгдæр кæнын. Ахсджиагдæр нысантæй иу у – бирæпрофилон техникумы бæстыхæйтты æмæ æмдзæрæны бындурон цалцæг.
Дзгойты Станислав ныридæгæн ахадгæ куыст бакодта. Кæд домаг у, уæддæр алчидæр æнкъары йæ аудындзинад. Æмæ студенттæ уымæн аргъ кæнынц. Уыдонæн ног директор у ныфсхаст, дæсны æмæ зæрдæхæлар адæймаджы дæнцæг.
Бирæвæрсыг техникумы ахуыргæнджытæ дæр разы сты Дзгойты Станиславы архайдæй директоры бынаты. Ахуыргæнæндоны райрæзтмæ цы æвæрæн хæссы, уымæй зæрдæ райы.
Дзгойты Станислав у хъæбатыр, æмæ фæлтæрдджын æхсæнадон архайæг. Директоры куыст та у йæ царды ног къæпхæны райдиан.
