Æрцыдысты, сывæллæттæн бузныг зæгъынмæ, цы фыстæджытæ сæм æрвыстой, уый тыххæй
Сæрмагонд æфсæддон операцийы архайджытæ бабæрæг кодтой Алагиры 2-æм скъола. Æрцыдысты, сывæллæттæн бузныг зæгъынмæ, цы фыстæджытæ сæм æрвыстой, уый тыххæй. Хæстонтæ сæ семæ хастой талисманты хуызæн æмæ зыдтой, сæхимæ сæм кæй æнхъæлмæ кæсынц. Фембæлды архайджытæн сарæзтой экскурси скъолайы æмæ музейы. Экспозицийы – сæрмагонд æфсæддон операцийы хæстонты хуызистытæ æмæ дзаумæттæ. Бæлвырддæр радзурдзæн Хъайтмазты Дзерассæ.
Æфсæддонтæ Алагиры 2-æм скъолайы сты бæлвырд хæсимæ – «бузныг» зæгъын рæзгæ фæлтæрæн. Сæрмагонд операцийы зонæйы алы сывæллоны фыстæгæн дæр ис стыр нысаниуæг. Хæстонтæ куыд зæгъынц, афтæмæй фыстæджытæ æмæ нывтæ бирæтæн систы æцæг талисмантæ.
Хъуппеты Анастасияйæн æхсызгон уыд батальон «Алани»-йы медицинон хоимæ базонгæ уæвын. Афтæ йæм кæсы, цыма Хъалæгаты Гаянæйы тыххæй алцыдæр зоны. Йе *сгуыхтдзинæдты тыххæй йын Анастасия радзырдта конкурсон видеороликы. Скъоладзау архайдта сфæлдыстадон ерыс «Æз уарзын мæ район»-ы.
Уазджытæн сарæзтой экскурси. Скъолайы музейы алы экспонат дæр у, фæлтæртæ чи иу кæны, историйы ахæм хай. Ам ис кубоктæ æмæ майдантæ. Рамбылдтой сæ ерысты. Фæлæ сæйрагдæр у намыс. Зноны скъоладзау чи уыд, абон та бæстæйы сабырдзинад чи хъахъхъæны, уыдоны тыххæй намыс. Сæрмагонд æфсæддон операцийы архайджыты хуызистыты раз – республикæйы сæргълæууæг Сергей Меняйло нырма скъоладзау куы уыд, уæды рæстæджы бургонд къамтæ.
Скъолайы директоры ныхæстæм гæсгæ, ахæм фембæлдтытæ систы традици. Фатима Судомонидзе куыд зæгъы, афтæмæй ахсджиаг у, фæлтæрæй фæлтæрмæ хæццæ кæнын историйы æцæгдзинад. Майы ам байгом кæндзысты мемориалон фæйнæг, ахуыргæнæндоны рауагъдонтæй сæрмагонд æфсæддон операцийы чи фæмард, уыдоны номыл.
