Архайынц дзы Цæгат Ирыстоны, Краснодары крайы, Самарæйы, Липецкы, Воронежы æмæ Белгороды облæстты фæсивæд
Фидæны хъомылгæнджытæ, активисттæ, æхсæнадон иугæндты раздзогтæ. Санаторий «Осетия»-йы райдыдта, æппæтуæрæмеон проект «Аланийы профессионалон стартты» регионты хсæн тематикон æмбырд. Архайынц дзы Цæгат Ирыстоны, Краснодары крайы, Самарæйы, Липецкы, Воронежы æмæ Белгороды облæстты фæсивæд. Уыдонæн сывæллæтты Æппæтуæрæсеон центр «Орленок»-ы специалисттæ бацæттæ кодтой дæсныйадæвдисæг ахуыртæ. Бæлвырддæр хабæрттæ Хъайтмазты Дзерассæйы сюжеты.
Национ кæфтытæ æмæ зарджытæ, адæмы къухæмдзæгъд. Афтæ райдыдта регионты хсæн тематикон æмбырд «Профессионалон старттæ – Алани». Цæуы санатори «Осетия»-йы бындурыл. Нæ республикæйы лæппутимæ æмæ чызджытимæ иумæ сты Уæрæсейы 6 регионы минæвæрттæ.
31-æм октябры онг архайджытæм æнхъæлмæ кæсынц фæлтæрдджын специалистты дæсныйадæвдисæг ахуыртæ, цымыдисаг ирхæфсæн æмæ зонадон программæтæ. Сæ нысан у, æрыгон лидерты райрæзтыл æмæ сын æххуыс кæныныл кусын. Æрбахуыдтой сывæллæтты Æппæтуæрæсеон центр «Орленок»-ы эксперттæ, Краснодары крайы æмæ нæ республикæйы ахуырадон кусæнуатты специалистты.
Рæзгæ фæлтæр ма систы хъазт «Нæ профессионалон старт»-ы архайджытæ. Сæ бон уыдзæн социалон нысаниуæг кæмæн ис, ахæм проекттыл кусын. 3 æппæтæй хуыздæр хъæппæрисы та гæнæн уыдзæн царды рауадзын, сæ автортæ цы регионтæй сты, уыдоны.
Цæгат Ирыстоны ахæм æмбырдтæ фыццаг хатт не сты. Æххæстгонд цæуынц федералон проект «Профессионалон старттæм» гæсгæ 2022-æм азæй фæстæмæ. Мадзалы архайджытæ – «Фыццæгты змæлды» активисттæ. Уыдоны фæнды сæ фидæн педагогон куыстимæ сбæттын. Сæ фæндаг гом кæны сывæллæтты лагерьты раздзогтæй бакусыны гæнæнæй. Ацы æмбырд у – сывæллæттимæ кусынмæ цæттæгæнæн фæз.
Æмбырд сарæзтой Цæгат Ирыстоны раздзогты æхсæнадон иугонд «Ног цæстæнгас», Краснодары крайы æхсæнадон организаци «Молодежная палата Кубани» республикæйы ахуырады æмæ наукæйы, стæй фæсивæды хъуыддæгты фæдыл комитеты æмæ бархиондзинадæн æххуысы ресурсон центр «Кавказы бархион»-ы æххуысæй.
