Уыдонæн сæ дзæвгар хай сты сывæллæттæ
Сывæллæтты ахуыргæнæн-профилактикон санаторий «Юность»-ы æрбынат кодтой Донбассæй æрбалидзæг 100 адæймагæй фылдæр. Уыдонæн сæ дзæвгар хай сты сывæллæттæ. Бабæрæг сæ кодтой Уæрæсейы скъоладзауты змæлды регионалон хайады минæвæрттæ. Акци «Мах стæм иумæ»-йы волонтертæ сæрмагондæй Донецкы æмæ Луганскы республикæтæй адæмæн сæмбырд кодтой гуманитарон æххуыс. Фидараты Маринæ радзурдзæн бæлвырддæр.
Хæрз хотæ Лиля æмæ Юля фыццаг бон сбадтысты партæты уæлхъус, Ирыстонмæ ссæуыны фæстæ. Сæхæдæг куыд зæгъынц, афтæмæй ахуырыл сæнкъард сты. Ног формæ, ахуыргæнæн чингуытæ, скъолайæн хъæугæ фыссæнгæрзтæ, фæлæ æппæтæй сæйрагдæр – хъæрмуд ахастдзинад. Сæ ахуырадон программæ кæй не ййафынц, уый дæр æнцон срастгæнæн хъуыддаг у, зæгъынц чызджытæ.
Æрвылбоны цардмæ раздæхын, æнæ тæрсгæ-ризгæйæ, уый у ныртæккæ æппæты сæйрагдæр урок, æмæ йæ ацы кæстæртæ зæрдиагæй ахуыр кæнынц.
Йæхимæ сывæллæтты æрбахæстæг кæнгæйæ, зæгъы – се ппæт дæр ын сты йæхиуæттæ. Татьяна Сгуровская у райдиан кълæсты ахуыргæнæг. Ам, эвакуацийы уæвгæйæ, ацы лæппутæн æмæ чызджытæн сси мады хуызæн. Ныййарджытæн сæ фылдæр баззадысты Украинæйы. Сæ райгуырæн горæт Ясиноватыйæ æмæ Донецкы облæстæй лыгъдысты æвæстиатæй. Сæ фæндаг цы зын æмæ тæссаг уыди, уый сæ рох нæу, фæлæ сын алы хатт дæр уыцы мысинæгтæ сæ зæрдæ сæнкъуысын кæнынц.
Ирыстонмæ кæй ссæудзысты, уый тыххæй лæппутæ æмæ чызджытæ базыдтой фæстагмæ. Цард доны къусæй уæлдай нæу, зæгъы Татьяна Александровна. Кæцырдæм фæкъул уыдзæн, стæй кæдæм абалц кæндзынæ, уый бæрæг нæу. Фæлæ йæ уыимæ нæ регионимæ бæттынц рæсугъд æмæ хъæрмуд мысинæгтæ.
Æхсæвæй-бонæй куыст цæуы гæххæттытæ скæныныл. Уыимæ адæмæн кæнынц медицинон æмæ психологон æххуыс. Сывæллæтты санаторий «Юность»-ы бæстыхайы æрбынат кодтой Луганскы æмæ Донецкы адæмон республикæтæй æрбалидзæг адæм. Сты сæдæйæ фылдæр. Уыимæ дзæвгар хай – сывæллæттæ. Се ппæт дæр ифтонг сты хойрагæй, химæ зилæн фæрæзтæй æмæ ахуыргæнæн кусæнгæрзтæй.
Хæлардзинады æмæ аудындзинады тоннæтæ. Æппæтуæрæсеон акци #МыВместе-йы волонтертæ æмæ активисттæ фыццæгтæ бацархайдтой хæрзаудæн куысты. Скъоладзауты Уæрæсейаг змæлды регионалон хайады сæмбырд кодтой гуманитарон æххуыс. Уæлдай æргом аздæхтой сывæллæттæм. Се мгæрттæ сын хæссынц чингуытæ, стъолыл хъæзтытæ, стæй æппæты кæстæртæн хъазæнтæ.
Дзæуджыхъæуы профессионалон колледжы директор Хуытъинаты Светланæ йæхи дæнцæгæй æвдисы, куыд ахсджиаг у зæрдæхæлар адæймаг уæвын.
Ацы хореографион номыр чызджытæ бацæттæ кодтой сæ рауагъды бонмæ райгуырæн горæты. Уавæртæ аивтой, фæлæ фæндтæ æмæ нысантæ нæ. Кæстæртæ сæ зæрдæ дарынц, кафты студимæ та ногæй кæй цæудзысты, ууыл. Се сфæлдыстадон коллектив «Дети надежды» – у бирæ æппæтадæмон конкурсты призер. Рухс фидæн сын кæй уыдзæн, ууыл сæ ныфс дарынц. Ныртæккæ та ахуыр кæнынц сабыр арвы бын цæрыныл, хæлар хъуыддæгтæ кæныныл æмæ хорздзинад хъуыды кæныныл. Ирон æвзаджы фыццаг урокы сывæллæттæ сахуыр кодтой, кæд æнæзонгæ, уæддæр сын сæ зæрдæмæ хæстæг дзырд.
