2010-æм азы завод «Электроцинк» æмæ фæлхасгæнджыты бартæ хъахъхъæныны цæгатирыстойнаг управлени бафыстой сæрмагонд бадзырд. Уымæ гæсгæ куыстуат хъуамæ санитарон-
Евгения Ахвердяныл цæуы 5 азы. У Дзæуджыхъæуы 105-æм сывæллæтты рæвдауæндоны хъомылгæнинаг. Ацы уагдон хауы завод «Электроцинчы» санитарон-хъахъхъæнæн зонæмæ. Уымæ гæсгæ афæдз 2 хатты сабитæн ам фæдæттынц витаминон комплекстæ.
Мария Ахвердян: «Алцыдæр хорз у. Сывæллæттæ сты хъæлдзæг, сæхи хорз æнкъарынц. Мах тынг райгонд стæм».
Биопрофилактикон курс вæййы 25 боны. Витаминтæ исынц 3 азæй фылдæр кæуыл цæуы, уыцы сабитæ. Рагагъоммæ ныййарджытæ хъуамæ сæрмагонд гæххæттыл ныффыссой, ацы хъуыддагимæ разы кæй сты, уый.
Гуырцъыты Лидия, 105-æм сывæллæтты рæвдауæндоны медицинон кусæг: «Кальций Д-3, хæрды фæстæ райсомæй; «Витрум Кидс» – сихорæй, хæрды фæстæ; глютаминовая кислота – бон 2-3 хатты азтæм гæсгæ».
Уымæй уæлдай ма витаминон комплексмæ хауы кисель. Цæттæ йæ кæнынц фæткъуыйы пектинæй.
Санитарон-хъахъхъæнæн зонæйы ис 11 рæвдауæндоны. Уыдоны хъомылгæнинæгты «Электроцинк» витаминтæй æххæст кæны, фæлхасгæнджыты бартæ хъахъхъæнæн управлениимæ цы бадзырд бафыста, уымæ гæсгæ. Комплексыл бакуыстой Екатеринбурджы наукон центры специалисттæ. Ацы хъуыддаджы сæм ис стыр фæлтæрддзинад. Дохтыртæ куыд зæгъынц, афтæмæй биопрофилактикон курсы фæстæ сывæллæттæ сæхи зынгæ хуыздæр фенкъарынц.
Гуырцъыты Лидия, 105-æм сывæллæтты рæвдауæндоны медицинон кусæг: «Ныййарджытæ бафиппайынц уæлдай ивддзинæдтæ сæ сывæллæттæм. Фæхуыздæр вæййы сæ хæрд, сæ уæзыл бафты, фынæй хуыздæр фæкæнынц».
24-æм рæвдауæндон дæр хауы санитарон-хъахъхъæнæнзонæмæ. Ам дæр сывæллæттæ æрвылаз райсынц витаминтæ. Æндæраз ма «Электроцинк» рæвдауæндоны разамындæн зæрдæ бавæрдта, кислородон коктейльтæ кæнынæн сын аппараттæ кæй балхæндзæн, уымæй.
Татьяна Строганова, Дзæуджыхъæуы 24-æм рæвдауæндоны хицау: «2 азы размæ нын «Электроцинк» зæрдæ бавæрдта, коктейлертæ балхæнынæй. Алы къорды дæр хъуамæ уой. Фарстам. Телефонæй дæр сæм дзырдтам. Загътой-иу нын, нæ ферох кодтам, зæгъгæ. Фæлæ нæма ис. Кæд сын амал нæй. Фæлæ кæд ис ахæм гæнæн, уæд нын сæххæст кæной нæ курдиат».
Ацы фарста сбæлвырд кæнын нæ бантыст не сфæлдыстадон къордæн дæр. 2 къуырийы æнхъæлмæ кастыстæм «Электроцинк»-æй комментаримæ. Фæлæ заводы разамынды нæ бафæндыд, цы биопрофилактикон мадзæлттæ аразы, уыдоны хатдзæгты тыххæй дæр дзурын.
Хъайтмазты Дзерассæ
