Ирдæй дзы æвдыст цæуы Романовты хæдзары конвойы чи службæ кодта, уыцы ирæтты цардвæндаг
Санкт Петербурджы сæйраг музейы байгом уыдзæни Лотиты Игоры акварелон куыстыты равдыст. Ирдæй дзы æвдыст цæуы Романовты хæдзары конвойы чи службæ кодта, уыцы ирæтты цардвæндаг. Ацы дæлхайадæн бындур æвæрд æрцыди 19-æм æнусы райдиан. Конвойы историйы ирон æфсæдтæ тох кодтой Уæрæсейы империйы ныхмæлæуддзинæдты, уыимæ, Фыццаг дунеон хæсты дæр. Бирæ ирæттæ систы инæларты цинты аккаг. Æртæ императоры æмæ Паддзахы фырт Алексей дæр уыдысты конвойы уæнгтæ. Нывты авторы хъуыдымæ гæсгæ, ацы равдыст фылдæр ахæссæн ис наукон куыстмæ, нывкæнынадмæ нæ, фæлæ. Равдыст цæттæгæнгæйæ, стыр куыст бакодта Ирыстоны æмæ Мæскуыйы архивты æмæ музейон æвæрæнты. Бантыст ын фæлгонцтæ æмæ уæлæдарæсы хуызтæ, куыд фæзæгъынц, хицæн хæйттæй сæмбырд кæнын. Нывгæнæг ацы куыстыл бахардз кодта 20 азмæ хæстæг. Коллекцийы ис 100 портреты. Эрмитажы дзы равæрдзысты æрмæстæр сæ 5-æм хай. Нывгæнæг куыд зæгъы, афтæмæй ацы мадзал ирон адæмæн у стыр цау. Æмæ уымæй, сæххæст йæ бæллиц. Авторы ныхæстæм гæсгæ, мах хъуамæ Ирыстоны æфсæддон интеллигенцийы тыххæй зонæм алцыдæр, уый куы нæ уа, уæд нæ историзонынад уыдзæни æппæты дæлдæр къæпхæныл. Равдыст байгом уыдзæни райсом, æмæ йæ сбастой Хетæгкаты Къостайы райгуырдыл 160 азы кæй сæххæст, уыимæ, стæй Санкт Петербурджы ирон минæварады 270 азимæ.
