Цæгат Ирыстонæй Саратовмæ ацыд 43 адæймагæй делегаци
Саратовы кæронмæ æрхæццæ Уæрæсейы студентон уалдзæджы 32-æм фестиваль. Ацы цау нæ бæстæйы фæсивæдон мадзæлттæн уыд сæ ахсджиагдæртæй иу. Цæгат Ирыстонæй Саратовмæ ацыд 43 адæймагæй делегаци. Цавæр хатдзæгтимæ ссыдысты лæппутæ æмæ чызджытæ, уый тыххæй радзурдзæн Чехойты Фатимæ.
Гуцаты Фаризæмæ кафгæйæ бакæс, æмæ раст цыма доны хъаз ленк кæны, афтæ рæсугъд æмæ зæрдæмæдзæугæ у йæ уынд. Алы элементы дæр бавæры йæ уды хъарм æмæ уарзондзинад. Кафт у, 19 азы дæргъы йæ зæрдæйæн æхсызгондзинад чи хæссы, ахæм хобби. Алы бон йæ размæ æвæры ног хæс, æмæ йæ æххæст дæр кæны. Саратовы æппæтуæрæсеон фестиваль «Студентон уалдзæджы» цы кафт акодта, уый хуынди «Сожаление». Фаризæ куыд загъта, уымæ гæсгæ йæхи тынг цæттæ кодта – республикæйы кад хъахъхъæдта, æмæ йæ фæндыди йæ арæхстдзинад ирдæй равдисын. Æмæ йын уайгæ дæр ракодта. Йæ кафт æрмæст ирон аивадуарзджыты зæрдæтæм нæ фæцыд. Фестивалы Уæрæсейы иннæ регионтæй чи архайдта, уыдон дæр ын стыр аргъ скодтой. Гуцаты Фаризæ «Адæмон кафт»-ы номинацийы сси фыццаг къæпхæны лауреат.
32-æм Уæрæсейон фестивалы «Уæрæсейы студентон уалдзæджы» та ногæй азæлыд Цгъойты Таймуразы ном. «Модæ»- йы номинацийы сси фыццаг къæпхæны лауреат. Ивгъуыд аз йæ коллекци «Посвящение» -имæ æппæтуæрæсеон студентты фестивалы рамбылдта сæйраг хæрзиуæг – Гран-при. Ныр та Саратовы æрыгон дизайнер равдыста ног коллекци «Отражение». Таймураз дарæс сарæзта хъуымац, сæрак æмæ цармæй тар хуызты. Музыкæйæ райдай æмæ модельты раст рухсгондæй фæуы. Алцæуылдæр лæмбынæг бæкуыста. Цæттæ йæм кодта афæдз. Ацы коллекци рауад хуыздæр йæ раздæры 70-йæ.
Саратовмæ ацæуын бантысти нæ республикæйы фæсивæды комитеты руаджы. Цæгат Ирыстоны делегацийы уыди 43 адæймаджы. Лæппутæ æмæ чызджытæ се сфæлдыстадон куыстытæ æвдыстой 16 номинацийы.
Ацы уалдзæг Цæгат Ирыстон Æппæуæрæсеон студентон фестивалы самбырд кодта хæрзиуджыты хъæздыг тыллæг. Уæлахиздзинадæй уæлдай ма нæ чызджытæ æмæ лæппутæ рамбылдтой призтæ номинацитæ «Академион вокал» æмæ «Адæмон зарæджы» дæр. Æппæтуæрæсеон фестиваль у ирд цау, нæ бæстæйы курдиатджындæр фæсивæды иугæнæг. Азæй азмæ йæ архайджыты нымæц кæны фылдæр, йæ программæ та – цымыдисагдæр.
