Хуыздæрты хсæн уыдысты Паддзахадон телерадиокомпанийы радиойы амонæг Къадзаты Станислав æмæ шеф-редактор Черчесты Зæринæ
Сбæрæг сты Цæгат Ирыстоны сæргълæууæджы æрвылазон премийы лауреаттæ. Хуыздæрты хсæн уыдысты Паддзахадон телерадиокомпанийы радиойы амонæг Къадзаты Станислав æмæ шеф-редактор Черчесты Зæринæ. Сæ иу номинаци «Кад æмæ намысы», иннæ та номинаци «Наукæйы æмæ технологиты аз Уæрæсейы». Ацы аз ма сæрмагонд премийы аккаг сси национ журналистикæйы къабазы газет «Дигора»-йы сæйраг редактор Сакъиты Эльбрус. Æппæт архайджытæн дæр лæвæрд æрцыд арфæйы фыстæджытæ. Сергей Меняйло журналисттæн раарфæ кодта сæ профессионалон бæрæгбоны фæдыл. Куыд фæбæрæг кодта, афтæмæй абоны царды тынг ахсджиаг сты медиа тыгъдад æмæ дзыллон информацион фæрæзтæ. Фембæлды рæстæг ма æрдзырдтой Цæгат Ирыстоны медиа тыгъдады райрæзты фарстатыл. Республикæйы сæргълæууæг загъта, Ирыстоны ног фæзтæ саразын кæй хъæуы, уыимæ форумтæ. Уым иртæст цæудзысты ацы къабазы фарстайаг хъуыддæгтæ. Фидæны ма фæнд кæнынц профессионалон конкурс саразын. Сергей Меняйло ма загъта, йæ цæст кæй дары медиа тыгъдады куыстмæ. Кæсы федералон æмæ республикон официалон дзыллон информацион фæрæзтæ.
Мыхуыры боны кадæн республикæйы журналистты Цæдис дæр журналистты схорзæхджын кодта кады гæххæттытæй. 13 журналисты хæрзиуджытæ райстой журналистикæйы æмæ медиаиндустрийæйы рæзтмæ стыр æвæрæн кæй бахастой, уый тыххæй. Бирæтæ та фæнысан кодтой, журналистты Цæдисы юбилейон афæдзы кадæн. Уымæй уæлдай, Цæдисы республикон хайад фæфылдæр ног уæнгтæй. Организацийы рæнхъыты фæзындысты Багаты Элизæ, Хетæгкаты Артур, Мазаты Тимур æмæ Сугъараты Елизаветæ.
