Ацы хъуыддагыл ныхас цыди аппаратон æмбырды
Сергей Меняйло бадомдта, мобилизацийы цыдмæ карздæр цæст дарын. Ацы хъуыддагыл ныхас цыди аппаратон æмбырды. Хайон мобилизацийы тыххæй уагæвæрдмæ чи нæ хауы, уыдоны хъуамæ ма кæной. Ахæм цаутæ гыццыл нæй, фарстайыл кусгæйæ уагъд цæуы рæдыдтытæ, æмæ сыл хъæуы æвæстиатæй бакусын, загъта сæргълæууæг. Бадомдта, цæмæй алы районы дæр арæзт æрцæуа оперативон штаб, æмæ йæ уæнгтæ сæ цæст дарой мадзæлтты цыдмæ. Республикæйы разамонæг бахæс кодта, цæмæй мобилизацимæ чи бахауди, уыдонæн сæ уæлæмхасæн ифтонггæрзты хæрдзтæн скæной компенсаци, стæй бацæттæ кæнын хъæуы, гуманитарон æххуыс сæмбырд æмæ арвитыны мадзæлттæ. Уымæн фæрæзтæ радих кæндзысты бюджетæй. Районты сæргълæуджытæн бахæс кодтой, цæмæй бæрæгбæттæ арвитынæн хæрдзтæ фæкъаддæр кæной.
Уымæй уæлдай æмбырды ныхас цыди сезоны гриппы ныхмæ вакцинацийыл. Прививкæтæ кæнынц куыд хистæртæн, афтæ кæстæртæн дæр. 40% фæфылдæр ис диспансеризаци дæр. Цæуы поликлиникæты æмæ цæугæ медицинон комплексты. Сергей Меняйло бадомдта, диспансеризаци сывæллæттæн дæр скæнын. Цæмæй ахуырадон процесс хъыгдард ма цæуа, уый тыххæй спайда кæндзысты мобилон комплекстæй. Ацы мадзæлттæм йæ цæст дардзæн æнæниздзинадхъахъхъæнынады министрад.
