Республикæйы Сæргълæууæг куыд фæнысан кодта, афтæмæй хъуыддаг хъуамæ æххæстгонд æрцæуа æнæкъуылымпыйæ
Сергей Меняйло финансты министрадæн бахæс кодта, фæллойы æмæ социалон рæзты министрадимæ иумæйагæй социалон паспорттæ хынцгæйæ, мобилизацигонд æфсæддонты бинонтæн æххуыс кæнын райдайын. Республикæйы Сæргълæууæг куыд фæнысан кодта, афтæмæй хъуыддаг хъуамæ æххæстгонд æрцæуа æнæкъуылымпыйæ. Фæллойы æмæ социалон рæзты министр Айдарты Алинæ куыд зæгъы, афтæмæй уыцы иу хатт фиддонтæ ныридæгæн райстой адæмы 87%. Аппаратон æмбырды ма æрныхас кодтой цæрæнуæтты-коммуналон хæдзарады системæйы куыстыл дæр. Рассветы кæронмæ фæци нуазыны донæй сифтонг кæнынæн донцъирæнты арæзтад. Хæстæгдæр рæстæг сæ ратдзысты эксплуатацийы. Дзæуджыхъæуы онкодиспансеры хъармгæнæны цалцæгыл Сергей Меняйлойы уынаффæмæ гæсгæ резервон фондæй дихгонд æрцыди 3 милуан сомы. Уымæй уæлдай, æмбырды ныхас цыди районты сæргълæуджытимæ хæрдзты оптимизацийыл бакусын кæй хъæуы, ууыл.
