Фыццаджыдæр хъармæй сифтонг кæндзысты сывæллæтты рæвдауæндæттæ, скъолатæ æмæ рынчындæттæ
Сергей Меняйло бахæс кодта, социалон куыстуæттæм хъарм рагагъоммæ радтын, цалынмæ официалон æгъдауæй хъармгæнæн сезон нæ райдыдта, уæдмæ. Фыццаджыдæр хъармæй сифтонг кæндзысты сывæллæтты рæвдауæндæттæ, скъолатæ æмæ рынчындæттæ. Гидрометцентры бæрæггæнæнтæм гæсгæ, хæстæгдæр бонты республикæйы температурæ æрхаудзæн 4 градусы онг. Регионы аварион службæты раивтой сæрмагонд куысты фæткмæ. Сæ архайдмæ сын бæстон цæст æрдарынмæ фæсидт Сергей Меняйло. Аппаратон æмбырды æркастысты къорд ахсджиаг фарстамæ. Зæгъæм, тагъд æххуысы бригадты дохтыртæ кæй нæ фаг кæны, уый. Хицауады сæрдары хæдивæг Александр Реутов куыд фехъусын кодта, афтæмæй, службæйы куыст кæй фæкъуылымпы, уый аххосæгтæй иу у фæлладуадзæн сезон кæй нæма фæци, уый. Йæ ныхæстæм гæсгæ ацы бонты уавæр фæхуыздæр. Сергей Меняйло ма бадомдта, Уæлладжыры комы хæххон районты æнæзакъон арæзтадмæ карз цæст æрдарын. Æнæзакъон арæзтæдтæ æрмæст райхалын нæ, фæлæ ма сын сæ хицæутты ивар дæр кæнын. Сергей Меняйло ма иу хатт йæ хъуыдытæ загъта ивгъуыд къуырийы кадртимæ цы ивддзинæдтæ æрцыди, уый тыххæй дæр.
