Журналисттæ нæ республикæ бабæрæг кодтой, Цæгат Кавказы федералон зылды пресс-тур æххæст кæнгæйæ
Цæгат Ирыстоны Сæргълæууæг Сергей Меняйло фембæлд федералон дзыллон хабархæссæг фæрæзты минæвæрттимæ. Журналисттæ нæ республикæ бабæрæг кодтой, Цæгат Кавказы федералон зылды пресс-тур æххæст кæнгæйæ. Бакуыстой йыл Уæрæсейы экономикон рæзты Министрад æмæ федералон информацион агенстад ТАСС. Регионы разамонæг куыд загъта, афтæмæй ахсджиаг у дзыллон информцийы фæрæзты нысан, Цæгат Кавказы æвæрццæг фæлгонц аразыны хъуыддаджы. Ныхас цыд нæ республикæйы социалон-экономикон рæзты куыстыл. Цæгат Ирыстоны хъомысыл дзургæйæ, Сергей Меняйло загъта, Дзæуджыхъæу рагæй дæр кæй сси Цæгат Кавказы сæйраг культурон горæт. Уыимæ æппæтуæрæсеон æмвæзады театралон, аивадон æмæ музыкалон мадзæлтты центр. Журналисттимæ фембæлды ма ныхас цыд иннæ ахсджиаг куыстыл дæр. Бæлвырддæр та туристты Ирыстоны культурæимæ, æрдзимæ, историимæ æмæ традициимæ чи зонгæ кæны, уыимæ.
Журналистты ма базонын фæндыд нæ регионы промышленносты, хъæууон хæдзарады, туризмы æмæ киноиндустрийы рæзты тыххæй. Республикæйы Сæргълæууæг радзырдта, ныридæгæн цы куыст бакодтой, æмæ ма цæуыл архайдзысты, уый тыххæй. «Уæрæсейаг газеты» журналист та Сергей Меняйлойы бафарста, Цæгат Ирыстоны эконмоикон рæзты сæйрагдæр цавæр къабаз у, уый. Республикæйы Сæргълæууæг радзырдта цалдæр къабазы тыххæй. Куыд загъта, афтæмæй ахсджиаг у бæлвырд æмæ бæстон архайын алы къабазы дæр. Æрмæст афтæмæй ис хорз бæрæггæнæнтæм æнхъæлмæ кæсын.
