Бæлвырд дзырдтой республикæйы скъолаты хъарм хæринаг дæттыны хъуыддаг уæлдæр æмвæзадмæ ракæныныл
Сергей Меняйло фембæлд Хойраджы институты разамонджытæ Владимир Чернигов æмæ Сергей Масловимæ. Бæлвырд дзырдтой республикæйы скъолаты хъарм хæринаг дæттыны хъуыддаг уæлдæр æмвæзадмæ ракæныныл. 21 февралы Цæгат Ирыстоны сараздзысты Уæрæсейы паддзахадон Советы Ахуырады къабазы къамисы æмбырд. Архайдзысты дзы Цæгат Кавказы федералон зылды регионты разамонджытæ. Владимир Чернигов куыд бафиппайдта, афтæмæй мадзалы фысымæн нæ республикæ хуымæтæджы нæ равзæрстой. Цæгат Ирыстонæн ис хорз фæлтæрддзинад скъоладзауты хойраджы къабазы æмæ дзы фæхай кæндзысты иннæ регионтимæ. Уыцы бон сараздзысты дунеон социалон акци «Здоровое питание школьника» – йы регионалон къæпхæн. Йæ нысан у сывæллæты æмæ сæ ныййарджыты æнæниз цардыуаг æмæ хойрагмæ æмхиц кæнын. Архайджыты хъæудзæн бацæттæ кæнын видео-урок æнæниз хойраджы тыххæй. Уæлахиздзауты арвитдзысты сывæллæты лагерь «Артекмæ». Владимир Чернигов уымæй уæлдай бахаста фæндон, цæмæй профессионалон дæсныдзинады чемпионат WorldSkillsRussia-мæ бахæссой компетенци Скъолайы хæринаггæнæг. Уыцы фарстайыл ныртæккæ кусынц Дзæуджыхъæуы базарадон-экономикон колледжы. Республикæйы разамонæг уыцы хъæппæристимæ сразы æмæ загъта, сæ сæххæст кæнынмæ кæй баххуыс кæндзæн, уый тыххæй.
