Ныхас кодтой сæ риссагдæр фарстатыл
Сергей Меняйло фембæлд тагъд æххуысы клиникон рынчындоны коллективимæ. Ныхас кодтой сæ риссагдæр фарстатыл. Уыдон та чысыл нæ уыдысты, æмæ медиктæм фæзындысты пандемияйы рæстæг. Зæгъæм, рынчындоны нæ фаг кæнынц пациенттæн бынæттæ СПИД-корпусы. Уый у нырма иунæг корпус, ковид-рынчынты чи исы, ахæм. Медикаменттыл дзургæйæ та загътой, кæй балхæдтой 105 къоппы препарат «Артлегиа». Ныртæккæ сты Мæскуыйы скълады, æмæ рæхджы схæццæ уыдзысты нæ республикæмæ. Ныхас ма цыд туаггуыр ног хуызы дæттыны системæйыл. Йæ монтаж бацахста, цас нысан кодтой, уымæй фылдæр рæстæг. Подрядон организацийы ныхæстæм гæсгæ, куыстытæ фæуыдзысты 30 боны мгъуыдмæ. Уымæй дарддæр балхæдтой туаггуыры концентратортæ. Æлхæнынц ма 4 туаггуыры станцæйы. Сæ иу сæвæрдзысты тагъд æххуысы клиникон рынчындоны. Кæронмæ æрхæццæ кæны инвестортимæ æмгуыстады фæдыл ныхас дæр. Нысантæм гæсгæ хъуамæ арæзт æрцæуа туаггуыры завод. Уый фадат ратдзæн иу суткæмæ туаггуыры 24 тоннæйы уадзынæн. Сергей Меняйло ма бадодта æргом ныхас кæнын алы лыггæнинаг фарстайыл дæр. Æнæниздзинадхъахъхъæнынады министрад хъуамæ арæхдæр æмбæла медицинон куыстуæтты коллективтимæ, бæстон кæса алы хъуыддагмæ дæр, цæмæй сыл иумæйаг хъарутæй куыст цæуа, уый тыххæй.
