Республикæйы сæргълæууæг хъæбатырты хæстæджытæн ракодта тæфæрфæс æмæ сын радта сæ хæрзиуджытæ
Республикæйы сæргълæууæг Сергей Меняйло фембæлд, Украинæйы сæрмагонд æфсæддон операцийы чи фæмард, уыцы хæстонты бинонтимæ. Мадзалы архайдтой Уæрæсейы гвардийы Цæгаткавказаг зылды штабы хицау, инæлар-майор Евгений Детковских, Уæрæсейы гвардийы республикон управленийы хицау, инæлар-майор Валерий Голота æмæ Уæрæсейы гвардийы Дзæуджыхъæуккаг иугонды командæгæнæджы хæстæ рæстæгмæ æххæстгæнæг Роман Трубин. Æфсæддон хæс æххæстгæнгæйæ хъæбатырдзинад, ныфс æмæ удуæлдайдзинад кæй равдыстой, уый тыххæй национ гвардийы æфсæдты федералон службæйы кæстæр сержант æмæ ефрейтор хорзæхгонд æрцыдысты Лæгдзинады ордентæй сæ амæлæты фæстæ. Сергей Меняйло хъæбатырты хæстæджытæн ракодта тæфæрфæс æмæ сын радта сæ хæрзиуджытæ. Загъта сын бузныг, æцæг патриотты кæй схъомыл кодтой, уый тыххæй. Регионы разамонæджы ныхæстæм гæсгæ, бæстæйы сабыр фидæны тыххæй йæ цард чи нæ бавгъау кодта, уыдон рохуаты никуы баззайдзысты. Загъта ма, республикæ дарддæр кæй æххуыс кæндзæн, йе фсæддон хæс æххæстгæнгæйæ чи фæмард, уыцы хæстонты бинонтæн. Евгений Детковских дæр æфсæддонты хæстæджытæн ракодта тæфæрфæс йæхи æмæ Уæрæсейы гвардийы Цæгаткавказаг зылды командæгæнæг, инæлар-булкъон Сергей Захаровы номæй.
