Республикæйы разамонæг сын ракодта тæфæрфæс, æмæ хъæбатырты хæстæджытæн радта Лæгдзинады ордентæ
Цæгат Ирыстоны Сæргълæууæг Сергей Меняйло фембæлд, Украинæйы сæрмагонд операцийы чи фæмард, уыцы æфсæддонты бинонтимæ. Республикæйы разамонæг сын ракодта тæфæрфæс, æмæ хъæбатырты хæстæджытæн радта Лæгдзинады ордентæ. Уымæй дарддæр ма Сергей Меняйло фехъусын кодта, æппæт муниципалитетты, социалон службæты раз дæр кæй лæууы сæйраг хæс – æдзард æфсæддонты бинонтæн алывæрсыг æххуыс кæнын, уыимæ æппæт фарстаты дæр. Салдæттæ æмæ офицертæ сæ цард кæй раттынц, уый не ппæтæн дæр тынг зын у. Фæлæ ахæм хъæбатыртæй нæ сæр бæрзæндты хæссæм, загъта регионы разамонæг. Сæ амæлæты фæстæ Лæгдзинады ордентæ лæвæрд æрцыдысты дæлбулкъон Бичикаты Фезулæн, хистæр лейтенант Илья Семеновæн, лейтенант Александр Фроленкойæн, стæй ефрейтортæ: Хаситы Робертæн æмæ Бестауты Сæрмæтæн.
