Куыд фæбæрæг кодта, афтæмæй Цæгат Ирыстон фыццаг бонтæй фæстæмæ бавнæлдта сæрмагонд æфсæддон операцийы нысантæ æххæст кæнынмæ
Цæгат Ирыстоны Сæргълæууæг Сергей Меняйло хатдзæгтæ скодта ивгъуыд азы куысты бæрæггæнæнтæн. Куыд фæбæрæг кодта, афтæмæй Цæгат Ирыстон фыццаг бонтæй фæстæмæ бавнæлдта сæрмагонд æфсæддон операцийы нысантæ æххæст кæнынмæ. Афтæмæй равзæрд ирон лæппуты фыццаг бархион къорд Алани. Мелитополы кусы гуманитарон æххуысы иумæйаг центр, уырдыгæй æфсæддонтæн æрвитынц æнæмæнгхъæугæ дзаумæттæ. Уымæй уæлдай ныртæккæ кусынц æфсæддон госпиталь саразыныл. Регионы разамонæг куыд бахахх кодта, афтæмæй ацы аз стыр æргом аздахдзысты хæстоны реабилитаци æмæ социализацийы хъуыддагмæ. Уый тыххæй нæ республикæйы санаториты аразынц сæрмагонд службæтæ. Фæахадгæдæр кæнын хъæуы фæсивæдимæ куыст. Хъуамæ архайой нæ республикæйы æхсæнадон æмæ политикон царды. Сергей Меняйло куыд фæбæрæг кодта, афтæмæй нæ республикæйы скъоладзауты 75 проценты архайынц уæлæмхасæн ахуырады. Нæ республикæйы культурон бынты 80 проценты сты заууат уавæры. Уый тыххæй бацархайын хъæуы, цæмæй сæ бахъахъхъæныны куыст фæахадгæдæр уа, ууыл. Фарон нæ республикæйы реставраци скодтой культурон бынтыл кæй банымадтой, ахæм авд объекты. Бындурон цалцæг скодтой æртæ культурæйы хæдзары æмæ дыууæ музыкалон скъолайы. Уыцы куыстытæ сæххæст кодтой национ проект Культурæйы фæрцы. Сергей Меняйло куыд загъта, афтæмæй национ проектмæ хъæуы бахæссын Тæбæхсæуты Балойы номыл театры рацарæзт дæр. Тагъд рæстæг Цæгат Ирыстоны байгом уыдзæнис ирон æвзаджы центр. Йæ бындурыл æрмæст ирон æвзаг нæ ахуыр кæндзысты, фæлæ ма араздзысты программæтæ æмæ ахуыргæнæн чингуытæ.
