Ахæм объекттæ нæ республикæйы сты 200-йæ фылдæр
Ацы аз майы республикæйы Сæргълæууæг Сергей Меняйло сæрмагонд къамистæн бабар кодта бирæфатерон хæдзæртты бырæтты камерæтæн бæстон иртæст скæнын. Ахæм объекттæ нæ республикæйы сты 200-йæ фылдæр. Фæлæ сæм æмбæлгæ цæстдард кæй нæ цæуы, уый аххосæй арæх уавæр санитарон домæнтæн дзуапп нал дæтты. Уымæй та фæтыхсынц бынæттон цæрджытæ. Сергей Меняйло куыд загъта, афтæмæй алы хæдзары кæрты дæр хъæуы бырæтты контейнертæн фæзтæ скæнын. Бæлвырддæр хабæрттæ радзурдзæн Фидараты Маринæ.
Компани «Эра»-йы кусджытæ æппынæдзухдæр сты сæ куысты уæлхъус. Фæлæ алыхуызон аххосæгтæм гæсгæ бирæ хæттыты бырæттæ раласынц дзæвгар фæстæдæр. Бырæтты контейнерты 80 проценты нал бæззынц. Закъонмæ гæсгæ сæ хъуамæ баивой разамынддæттæг компанитæ. Стæй ма ис æндæр домæнтæ дæр, фæлæ æххæстгонд нæ цæуынц.
Радон хатт аппаратон æмбырды республикæйы сæргълæууæг йе ргом азхдæхта разамынддæттæг компаниты куыстмæ. Раздæр уал сын радтой амынддзинæдтæ 200 бирæфатерон хæдзары бырæтты куыст банывыл кæныны тыххæй. Фæлæ уыцы амынддзинæдтæ сæххæст кодтой æрмæстдæр хæдзæртты хицæутты æмбаладтæ. Афтæ банывыл кодтой Леоновы уынджы 3-æм хæдзары 2-æм корпус.
Бырæтты камерæтæ ма баззадысты Дзæуджыхъæуы цалдæр хæдзары. Хауæццæгтæ æппарынц камерæйы пъолмæ. Уый фæстæ йæ бырæттæласæн машинæты шофыртæ сæмбырд кæнынц сæхæдæг.
Бырæттæ ласыны хъуыддаджы ис бирæ фарстатæ. Хæдзæртты кæртытæ машинæтæй дзаг, хатгай бынатмæ бацæуæн нæ вæййы. Фарста алыг кæнынæн хъæуы профилон службæты æмархайд.
Аппаратон æмбырды куыд фехъусын кодтой, афтæмæй Дзæуджыхъæуы фондз хæдзары хаст æрцыд уынаффæ, бырæттæ кæдæм æппæрстой, уыцы бынæттæ сæхгæнын. Фæлæ горæты администрацыйæн та йæ бон нæу уым контейнертæн сæрмагонд фæзтæ радих кæнын.
Сергей Меняйло ма бафиппайдта, разамынддæттæг компаниты кæй хъæуы сæ куысты фæтк фæахадгæдæр æмæ фæрæвдздæр кæнын.
