Равдысты фæлгæты презентаци уыди нæ республикæйы стендæн
Республикæйы сæргълæууæг Сергей Меняйло Цæгат Ирыстоны делегациимæ архайдта фыццаг Кавказаг инвестицион равдыст байгом кæныны мадзалы, Минводы. Равдысты фæлгæты презентаци уыди нæ республикæйы стендæн. Аргъ ын скодта Уæрæсейы хицауады сæрдар Михаил Мишустин. Базонгæ, регионы цы продукци уагъд цæуы, уыимæ. Уый бынæттон цыхт, дæттæ, дзидзайы продукттæ, дыргътæ æмæ афтæ дарддæр. Премьер аныхас кодта нæ регионы разамонæгимæ. Сергей Меняйло йын радзырдта Цæгат Ирыстоны хъомысы тыххæй. Ныртæккæ нæ республикæйы царды уадзынц 5 ахсджиаг проекты. Уыдоны фæрцы инвестициты бæрц сси 21 миллиард сомæй фылдæр. Стæй ма уæлæмхасæн фæзынд 700 куысты бынаты. Уæвгæ та, интерактивон гæнæнты фæрцы мадзалы уазджытæ бæстон информаци райстой, республикæйы цы уавæртæ ис, уымæн. Равдыстой Ирыстонимæ зонгæ кæныны тыххæй видеоæрмæг, стæй цæстуынгæйæ та бынæттон товаруазджыты продукци. Стенды сæйраг тематикæ – экономикон рæзты моделы 5 проекты презентаци. Уый, агропромышленнон æмæ транспортон-логистикон комплекстæ, ног туристон къабæзты райрæзт, балер кæсаджы хæдзарад æмæ алы сезонты чи кусдзæн, уыцы туристон-рекреацион комплекс «Мамысон» арæзтад. Форумы фæзы цæуынц сесситæ, фембæлдтытæ æмæ дискусситæ. Алцыдæр баст уыди агропромышленносты, туризмы, цæрæнуæтты-коммуналон хæдзарады æмæ энергетикæйы райрæзтимæ. Уымæй уæлдай, равдысты программæйы ныхас цыди, инвестицион райрæзтæн ахадгæ чи уыдзæн, ахæм мадзæлттыл, стæй амалхъомдзинады кадртыл.
