Сты – алы къабæзты æнтыстдзинæдтæ чи равдыста, ахæм специалисттæ
Сергей Меняйло Уæрæсейы Федерацийы æмæ Цæгат Ирыстоны паддзахадон хæрзиуджытæ радта республикæйы цæрджытæн. Сты – алы къабæзты æнтыстдзинæдтæ чи равдыста, ахæм специалисттæ. Регионы разамонæг сын раарфæ кодта, æмæ сын йæ зæрдæ загъта дарддæр дæр æнæзæрдæхудт фæллой кæнын, нæ республикæйы æмæ нæ бæстæйы сæраппонд. Уæрæсейы Президенты Указмæ гæсгæ, культурæйы æмæ аивады сгуыхтдзинæдты тыххæй хорзæхджынгонд æрцыд Евгений Вахтанговы номыл Академион уырыссаг театры актрисæ Наталья Уварова. Наукон архайды фæдыл арфæйы аккаг сси Дзæуджыхъæуы наукон центры инновацион рæзты фæдыл директоры хæдивæг Лолаты Алан. Фæллойы æнтыстдзинæдты æмæ бирæ азты æнæзæрдæхудт куысты тыххæй Уæрæсейы Президенты Кады гæххæтт радтой æнæххæстбарджын æхсæнад «Газпром межрегионгаз Владикавказ»-ы директор Хъодзаты Аланæн. Президенты Арфæйы фыстæг радтой национ уæлæдарæс хуыйæг компанийы генералон директор Годжысаты Изольдæйæн, Абайты Васойы номыл гуманитарон æмæ социалон иртæстыты институты директор Хъаныхъуаты Зæлинæйæн. Кады гæххæт радтой нымæцон рæзты Комитеты сæрдар Гахаты Даниилæн. Киностуди «Нарт-Арт студия»-йы директор Туаты Теминæйæн радтой орден «Ирыстоны сæраппонд». Цæгат Ирыстоны адæмон нывгæнæджы ном амæй фæстæмæ хæсдзæн Цæгат Ирыстоны паддзахадон университеты нывкæнынады кафедрæйы доцент Есенаты Æхсар. Сергей Меняйло ма «Ирыстоны сæраппонды» майдан радта ирон адæмы уæлдæр советы сылгоймæгты комитеты сæрдары хæдивæг Хабæты Риммæйæн.
