Республикæйы разамонæг зындгонд ахуыргондæн арфæ ракодта йæ юбилейы фæдыл
РЦИ-А Сæргълæууæг Сергей Меняйлойæн фембæлд уыди историон наукæты доктор, археолог, Аланийы историйы къабазы раззагдæр специалист Владимиром Кузнецовимæ. Республикæйы разамонæг зындгонд ахуыргондæн арфæ ракодта йæ юбилейы фæдыл. Сæххæст ыл 95 азы. Фембæлд ацыди Дзæуджыхъæуы Цæгат Ирыстоны гуманитарон æмæ социалон иртæстыты институты. Сергей Меняйло йæ раныхасы загъта, – Мæ зæрдæ дын зæгъы æппæты фыццаг фидар æнæниздзинад. Бузныг дын дæ зонындзинæдтæ æмæ дæ куырыхондзинадæй, фидæны фæлтæртæн сæ æнæвгъау кæй лæвар кæныс, уый тыххæй, загъта Сæргълæууæг. Владимир Кузнецов дæр йæхи рдыгæй бузныг загъта æмæ фæнысан кодта, ног хъæппæристæ æмæ проекттыл кусынмæ цæттæ кæй у, æмæ Цæгат Ирыстоны рухс фидæнмæ цы æвæрæн бахаста, ууыл æрлæууынмæ кæй нæ хъавы, уый. Владимир Кузнецов у уæрæсейаг ахуыргонд-алановед. Бирæ азты архæйдта æппæт Цæгат Кавказы археологон æркъæхтыты. Йæ иртæстыты хатдзæгтæ мыхуыргонд сты бирæ чингуыты æмæ монографиты. Фарон Цæгат Ирыстоны ацыди ахуыргонды наукон-публицистон куысты презентаци. Уый сси Рагон Аланийы истори иртасынæн йæ наукон архайдты хатдзæг. Апрелы та йын ирон адæмы культурон æмæ историон хæзнатæ хъахъхъæныны æмæ бындуронæй иртасыны тыххæй лæвæрд æрцыди «Цæгат Ирыстоны кадджын гражданины ном».
