Республикæйы разамонæг президентæн радзырдта, нæ республикæйы социалон-экономикон райрæзты, стæй ныртæккæ регионы цы ахадгæ проекттæ æххæст кæнынц, уый тыххæй
Сергей Меняйлойæн фембæлд уыдис нæ бæстæйы президент Владимир Путинимæ. Республикæйы разамонæг президентæн радзырдта, нæ республикæйы социалон-экономикон райрæзты, стæй ныртæккæ регионы цы ахадгæ проекттæ æххæст кæнынц, уый тыххæй. Хицæнæй æрлæууыдысты сæрмагонд æфсæддон операцийы архайджытæн æххуысы мадзæлттыл. Сергей Меняйло бæлвырд радзырдта, Мамысоны курорты арæзтад куыд цæуы, уый. Регионы разамонæг Владимир Путинæн зæрдæ бавæрдта, ацы сезон курорт фыццаг туристты кæй суазæг кæндзæн, уымæй. Сергей Меняйло президентæн радзырдта хъæууон хæдзарады райрзты тыххæй дæр. Цæгат Ирыстоны ныртæккæ ис Уæрæсейы Хуссары æппæты егъаудæр фæткъуыты дыргъдон. Йæ фæзуат у иу мин гектарæй фылдæр. Фарон ныссагътой кæрдо бæлæстæ дæр. Ныхас цыдис, Беслæны теракты хъыгдард чи баййæфта, уыцы адæмæн æххуысы мадзæлттыл. Сергей Меняйло президентæн бузныг загъта, хъыгдардбаййафджыты реабилитацийы программæ кæй фæдæргъвæтиндæр кодта, уый тыххæй. Беслæны генералон пълан æххæст кæнгæйæ, ныртæккæ республикæйы кусынц 49 мадзалыл. Сæ иумæйаг аргъ у 8 миллиард сомы. Афæдзы кæронмæ æппæт мадзæлттæ æххæстгонд æрцæудзысты — зæрдæ бавæрдта Сергей Меняйло.
