Уым республикæйы сæргълæууæджы хæстæ рæстæгмæ æххæстгæнæг бабæрæг кодта районы сæйраг рынчындон, федта медицинон куыстуаты техникон хъомыс æмæ медикты фæллойы уавæртæ
Сергей Меняйлойæн кусæг балц уыдис Дыгуры районмæ. Уым республикæйы сæргълæууæджы хæстæ рæстæгмæ æххæстгæнæг бабæрæг кодта районы сæйраг рынчындон, федта медицинон куыстуаты техникон хъомыс æмæ медикты фæллойы уавæртæ. Рынчындоны сæйраг дохтыр Сабанты Нели куыд радзырдта, афтæмæй бындурон цалцæг домынц интенсивон терапияйы хайад æмæ хæрæндон. Уымæй уæлдай рынчындон хъуаг æййафы наркозы æмæ тугиртасæн аппараттæй. Нæй фæрæзтæ хуысгæ рынчынты ласынæн, исæнуат та домы ног пандус. Сергей Меняйло куыд загъта, афтæмæй баххуыс кæндзæн уыцы фарстатæ алыг кæныны хъуыддаджы. Дзырдтой, медицинон æххуыс алы профильтæм гæсгæ районты рынчындæттыл куыд байуарын хъæуы, ууыл дæр. Сергей Меняйло куыд загъта, афтæмæй алы рынчындонмæ дæр хъуамæ сфидар кæной ног технологитæм гæсгæ медицинон æххуысы къабæзтæ. Зæгъæм, Дыгуры районы рынчындоны бон у районты хсæн хирургон æххуыс дæттын. Сæйраг нысан та раздæрау уы медицинон лæггæдтæ се ппæтмæ хæццæ кæнын æмæ сын сæ хæрзхъæддзинад фæхуыздæр кæнын.
