Цæгат Ирыстоны Сæргълæууæг Сергей Меняйлойæн кусæг фембæлд уыд «Афганистаны ветеранты Уæрæсейаг цæдисы» цæгатирыстойнаг регионалон организацийы сæрдар Пхалæгаты Сергейимæ, «Афганистаны инвалидты республикон цæдисы» разамонæг Джаджиты Виталиимæ стæй Цæгат Ирыстоны ветеранты Советы сæрдар Фриаты Хъазыбегимæ. Бæстон ныхас цыд хæстон цауты ветерантæн социалон æххуыс кæныныл. Се хсæн – медицинон ифтонгдзинад, санаторон-курортон дзæбæхгæнæн мадзæлттæ æмæ æндæр ахсджиаг хъуыддæгтæ. Сергей Меняйло бабар кодта, республикон рынчындоны бындурыл саразын хицæн корпус сæрмагондæй æфсæддонтæн-интернационалисттæн. 2017-æй – 2021-æм азы онг 79 афгайнаг ветераны ацыдысты лæвар дзæбæхгæнæн мадзæлттæ федералон æмвæзады санаториты, 26 ветераны та – республикон объектты. Уый баст у уыимæ, æмæ республикон санаторитæм лавæр балцæгтæ райсæн зын у. Регионы разамонæг бабар кодта бæстондæр цæст дарын ацы фарстамæ. Афганистанæй советон æфсæдтæ ракæныны 33 азы бонмæ, Сергей Меняйлойы бардзырдмæ гæсгæ хаст æрцыд уынаффæ, Афганистаны хæстон цауты архайджытæн æмæ инвалидтæн, стæй æдзард хæстонты бинонтæн уыцы-иу хатты фиддонтæ ракæныны тыххæй.
