Уый кусæг балцы уыд Цæгат Ирыстоны
Цæгат Ирыстоны Сæргълæууæг Сергей Меняйлойæн кусæг фембæлд уыд Уæрæсейы æнæниздзинадхъахъхъæнынады Министрады æнæштатон сæйраг трансплантолог, академик Шумаковы номыл наукон медицинон центры директор Сергей Готьейимæ. Уый кусæг балцы уыд Цæгат Ирыстоны. Æрныхас кодтой регионы трансплантацион программæ байгом кæныныл, æмæ республикæйы цæрджытæн бæрзонд технологон æххуыс кæныныл. Сергей Готье ма бабæрæг кодта республикæйы клиникон рынчындон. Уым фæнд кæнынц программæ скусын кæнын. Аныхас кодта сæйраг дохтыр Митциты Асланимæ æмæ раззагдæр специалисттимæ. Федта рынчындоны хайæдтæ, аныхас кодта пациенттимæ. Цæгат Ирыстоны медицинæйæн уый уыдзæн зынгæ æмæ ахадгæ къахдзæф. Тагъд процесс нæу, домы рæстæг, бæлвырддзинад, фæлæ се ппæтæн дæр у ахсджиаг. Уымæн æмæ рынчынтæ нырыккон æххуыс исдзысты сæхи регионы, – загъта Сергей Готье.
