Мобилон медицинон центр ифтонггонд у тæккæ нырыккондæр кусæнгæрзтæй
Республикæйы сæргълæууæг Сергей Меняйлойы амындмæ гæсгæ Запорожьейы облæсты Черниговы районæн балæвар кодтой алыфадатджын медицинон комплекс. Мобилон медицинон центр ифтонггонд у тæккæ нырыккондæр кусæнгæрзтæй. Уыдоны фæрцы дæрддзæф хъæуты цæрджытæн сæ бон уыдзæн фыццаг медицинон æххуыс райсын æмæ низ раиртасын. Цæугæ комплексы пациенттæн сæ бон уыдзæн цалдæр профилон дохтыры æххуыс райсын. Уымæй дарддæр ма УЗИ скæнын. Машинæ кусдзæн, стационартæ æмæ бæлвырд специалисттæ кæм нæй, ахæм хъæуты. Ацы хæрзаудæн куыст сæххæст кодтой æмгуыстады бадзырдмæ гæсгæ. Раздæр æй Санкт-Петербурджы æппæтадæмон экономкион форумы бафыстой Цæгат Ирыстоны сæргълæууæг Сергей Меняйло æмæ Запорожьейы облæсты губернаторы хæстæ æххæстгæнæг Евгений Балицкий. Документмæ гæсгæ, нæ республикæ йæхимæ райста Запорожьейы облæсты Черниговы районæн хæрзаудæн хæстæ æххæст кæнын. Бæлвырддæр та – æххуыс цæудзæн инфраструктурæ сног кæныны, ахуыргæнæндæттæ цалцæг кæныны, ахуырадон процесс фæахадгæдæр кæныны, фæззыгон-зымæгон сезонмæ бацæттæ кæныны, æмæ æндæр ахсджиаг хъуыддæгты. Уæ зæрдыл уын æрлæууын кæндзыстæм, федералон хъæппæрисмæ гæсгæ, алы уæрæсейаг регион хъуамæ йæ дæлбар бакæна Запорожьейы æмæ Херсоны облæстты, Луганскы æмæ Донецкы адæмон республикæты районтæ, горæттæ æмæ хъæутæ.
