Субъекты разамонæг куыд загъта, афтæмæй хицауады фыццаградон хæстæй иу у æнæниздзинады фарстатæ снывыл кæнын
Медицинон кусджыты мызд, тагъд æххуысы бригадты æвæстиаты лæггæдтæ, льготæтæ кæмæ ис, уыцы рынчынты лæвар хостæй ифтонг кæнын. Ацы æмæ æндæр фарстатыл ныхас цыди республикæйы хæстæ æххæстгæнæг Сергей Меняйлойы æмæ æнæниздзинадхъахъхъæнынады министр Годжысаты Тамерланы фембæлды. Субъекты разамонæг куыд загъта, афтæмæй хицауады фыццаградон хæстæй иу у æнæниздзинады фарстатæ снывыл кæнын. Сергей Меняйло йе ргом фылдæр аздæхта медицинон кусджыты мыздмæ. Регионы разамонæг разы нæу фиддонты системæйæ. Йæ хъуыдымæ гæсгæ, ацы хъуыддаджы ис æркæсинаг фарстатæ. Карзæй бафарста, ахуырадон къæпхæны, кæнæ стажы тыххæй дохтыртæ уæлæмхасæн фæрæзтæ исынц, æви нæ? Ацы фарстамæ хъæуы бæстонæй æркæсын! Нæ дохтыртæ сæ фæллойы тыххæй хъуамæ исой аккаг мызд. Уый хауы кæстæр медицинон кусджытæм дæр, загъта Цæгат Ирыстоны сæргълæууæг. Сергей Меняйло министры æргом раздæхта, республикæйы районты цæрджытæй цы хъæстытæ цæуы, уыдонмæ. Бæлвырддæр та адæм разы не сты, тагъд æххуысы бригадты куыстæй. Рынчын сæм фенхъæлмæ кæсы сахатгай. Машинæтæ фаг не сты. Ацы фиппаинæгтæ аиуварс кæнын хъæуы хæстæгдæр рæстæг, карзæй загъта республикæйы разамонæг. Боны фæткы уыди хостæй ифтонг кæныны фарста дæр. Цæгат Ирыстоны цæрджытæ хъуамæ къуылымпытæ ма *ййафой хосты тыххæй. Фембæлды ныхас цыди национ проект «Æнæниздзинад» республикæйы куыд æххæстгонд цæуы, ууыл дæр.
