Мидхъуыддæгты министрады профилон управленийы хицау куыд фехъусын кодта, афтæмæй Цæгат Ирыстоны фæфылдæр синтетикон æмæ æрдæгсинтетикон наркотикты зилдухы цаутæ
Республикæйы сæргълæууæг Сергей Меняйлойы разамындæй арæзт æрцыд наркотикты ныхмæ къамисы æмбырд. Мидхъуыддæгты министрады наркотикты зилдухмæ цæстдарды управленийы хицау Хынцæгты Нодар куыд фехъусын кодта, афтæмæй Цæгат Ирыстоны фæфылдæр синтетикон æмæ æрдæгсинтетикон наркотикты зилдухы цаутæ. Уый хауы – метадонмæ, метилэфедронмæ, стæй тыхджын препараттæ – трамадол æмæ прегабалинмæ. Фыдракæндтæ æрцæуынц, сусæг бынæттæ кæй хонынц, уыдоны уылты. Ацы аз æрцахстой 75 фыдгæнæджы. Уыдонæй 26 сты бынæттон цæрджытæ. Уымæй дарддæр ма ведомствойы кусджытæ сбæрæг кодтой, нæ республикæмæ наркотиктæ куылты ластой, ахæм 9 каналы. Сергей Меняйло ма къамисы уæнгты ргом азæдхта уголовон хъуыддæгтæ аразынмæ. Бæлвырддæр та – наркотиктæ чи уæй кæны, уый тыххæй тæрхон кæмæн рахастой, уыдонæй иунæгæн дæр йæ исбон кæй нæ байстой, уымæ. Йæ хъуыдымæ гæсгæ уавæрмæ хъæуы æркæсын æмæ бацархайын, цæмæй наркотиктæ уæй кæнынæй цы фтиаг сисынц, уый паддзахады хардзмæ здæхт æрцæуа. Æдасдзинады федералон службæйы арæнхъахъхъæнæн управленийы хицауы хæстæ рæстæгмæ æххæстгæнæг Андрей Ермаков фехъусын кодта, афæдзы райдианæй цæстдарæн-уадзæн пункттæ Уæллаг Ларсы æмæ Дæллаг Зæрæмæгыл кæй æруырæдтой психотропон препаратты 3 контрабандæйы. Байгом кодтой уголовон хъуыддæгтæ. Фæлхасадмæ цæстдарды управленийы разамонæг Тыбылты Алан та радзырдта, ивгъуыд 5 мæймæ кæй бахыгътой, наркотиктæй фæхъæстæ уæвыны 17 цауы. Уый, фаронимæ абаргæйæ, уы 2,7 хатты къаддæр. Сергей Меняйло кæронбæттæны загъта, æппæт бæрнон ведомствоты иуæмæйаг хæс кæй у, наркотикты зилдух скуынæг кæнын, æмæ æмæ уыцы зианхæссæг хъуыддагмæ æмхиц чи у, уыдоны нымæц фæкъаддæр кæнын.
