Стыр æргом аздæхтой тамакойы æмæ никотин кæм ис, ахæм продукцийы æнæзакъон зилдухмæ
Цæгат Ирыстоны Сæргълæууæг Сергей Меняйлойы разамындæй арæзт æрцыд промышленнон продукцийы æнæнзакъон зилдухы ныхмæ æмбырд. Стыр æргом аздæхтой тамакойы æмæ никотин кæм ис, ахæм продукцийы æнæзакъон зилдухмæ. Цæгат Ирыстоны таможняйы хицауы хæдивæг Гусаты Алан куыд загъта, афтæмæй сæ ведомствæйы хъæппæрисæй арæзт цæуы мадзæлтты комплекс. Сæ сæйраг нысан у – æнæзакъон продукци нæ республиæмæ не руадзын. Бæстон цæстдард цæуы транспортон фæрæзтæм æмæ товартæм, Уæрæсейы арæныл куы рбахизынц, уæд, стæй нæ республикæйы мидбазарады дæр. Гусаты Алан ма загъта, æнгом æмгуыстад кæй кæнынц æндæр цæстдарæн оргæнтимæ. Уымæй дарддæр Уæрæсейы фæлхасадмæ цæстдарды управлениимæ æмархайд кæнынц Дзæуджыхъæуы бынæттон администрациимæ. Æмбырды архайджыты хъуыдымæ гæсгæ, хъæуы уæлæмхасæн мадзæлттæ снысан кæнын, цæмæй нæ республикæйы территорийы карз нозты æнæзакъон зилдух ма цæуа, уый тыххæй. Иннæ ахсджиаг фарста баст уыд хостæй ифтонг кæнынимæ. Æнæниздзинадхъахъхъæнынады министр Тебиаты Сослан куыд радзырдта, афтæмæй æппæт дзæбæхгæнæн организацитæ райстой регистраци, специалисттæ та ацыдысты сæрмагонд ахуыртæ. Ныхас ма цыд æндæр ахсджиаг фарстатыл дæр. Кæронбæттæны профилон ведомствотæн радтой бæлвырд амынддзинæдтæ.
