Куыст кæронмæ нæ фæци, фæлæ рагагъоммæ бæрæггæнæнтæ сты ахадгæ
Серотонин æддаг буарыл куыд ахады, уыцы миниуджытæ иртасыны фæнд скодта Цæгат Ирыстоны паддзахадон университеты аспирант Цыбырты Тамарæ. Скодта уал лабораторон фæлварæнтæ. Иртæстыты дыккаг къæпхæн та цæуы Дзæуджыхъæуы наукон центры. Куыст кæронмæ нæ фæци, фæлæ рагагъоммæ бæрæггæнæнтæ сты ахадгæ. Иртæстыты хатдзæгтæ автор раргом кæндзæн ацы аз. Бæлвырддæр хабæрттæ радзурдзæн Чехойты Фатимæ.
Цæгат Ирыстоны паддзахадон университеты аспирант, Уæрæсейы Наукæты Академийы Дзæуджыхъæуккаг зонадон центры биомедицинон иртасæнты институты кæстæр зонадон кусæг Цыбырты Тамарæ иртасы серотонины ахадындзинад адæймаджы æддаг буары ног кæнынадыл. Фыццаг къæпхæн кæронмæ æрхæццæ. Цыди ЦИПУ-йы. Цыбырты Тамарæ йæ иртæстытæн спайда кодта лабораторон уырытæй. Уыдоны бауагътой биологон буаргъæдтæ. Уый фæстæ, цæмæй бамбарой серотонин куыд фæбæрæг уæфтыты ног кæнынадыл, цалдæр боны лæмбынæг кастысты сæ туджы бæрæггæнæнтæм. Иртасæнтæ конд цыдысты ахуыргонды диссертаци хъахъхъæныны фæлгæты.
Иртасæнты дыккаг къæпхæн арæзт цæуы Уæрæсейы Наукæты Академийы Дзæуджыхъæуккаг зонадон центры. Сæрмагонд медицинон фæрæзы баиу кодтой æддаг буары чырæгтæ серотонинимæ æмæ кастысты, куыд рæзынц, уымæ. Микроскопæй пайдагæнгæйæ сын ахуыргæндтæ бæрæг кодтой сæ уавæр. Тынг лыстæг куыст у, домы сæрмагонд цæстдард. Иртасæнтæ кæронмæ нæма фесты, фæлæ бæлвырд сты рагагъоммæйы хатдзæгтæ. Рабæрæг, серотонин хорзырдæм ахады æддаг буары хъыгдард уæфтытæ ногкæнынадыл.
Æддаг буары уæфтытæ ног кæнынады хъуыддаджы серотонины ахадындзинад бæрæг кæнын у медицинæйы ног къабаз. Цыбырты Тамарæйы иртасæнтæ æххуыс уыдзысты æддаг буары хъыгдард уæфтытæ тагъддæр ног кæнынæн. Сæ руаджы фæуæрæхдæр уыдзысты уæззау æмæ иугæндзон низтæ дзæбæх кæныны мадзæлттæ.
Йæ иртасæнты хатдзæгтæ Цыбырты Тамарæ ахуыргæндты размæ рахæсдзæн ацы аз.
