Шофырты æрмæст æвзæр фæндæгтæ нæ тыхсын кæнынц. Арæх фæндаггон фыдбылызты аххосджын вæййынц фистæгæй цæуджытæ. Халынц сæрмагонд фæтк. Къæбысты Николай у хæххон паддзахадон аграрон университеты ахуыргæнæг.
Къæбысты Николай, хæххон паддзахадон аграрон университеты ахуыргæнæг: «Ам ис зæххы бын цæмæй рахизай, ахæм фадат. Бирæтæ уый не ххæст кæнынц, цæуынц трассæйыл. Бирæ хатт æвзæр хабæрттæ æрцæуы. Бирæ студенттæ дзы ис, æмæ дзы фыдбылызтæ рауайы».
Дыууæ мæймæ фистæгцæуджытимæ республикæйы æрцыд 30 фæндаггон фыдбылызы. 6 адæймаджы дзы фæмард, 27-æй фесты алыхуызон цæфтæ. Фылдæр хатт аххосджын уыдысты фистæгцæуджытæ сæхæдæг.
Фæндаджы сæрты сæрмагонд бынæтты ахизын, кæнæ кæм не мбæлы, уым. Арæх адæм тагъдгæнгæйæ нæ феххæст кæнынц фæндаггонд æгъдæуттæ. Афтæмæй сæвзæрын кæнынц тæссаг уавæр.
Фистæгцæуджытæй хъаст кæнынц шофыртæ дæр. Машинæты фæндагмæ рацæуынц, кæм не мбæлы, фæндаджы сæрты уым ахизынц, светофортæм лæмбынæг нæ кæсынц. Ахæм фæндаггон æгъдæуттæ хæлдтытæ æрцæуынц æппæтæй арæхдæр. Хуыгаты Болат 10 азы бæрц кусы маршрутон таксийыл. Куыд зæгъы, афтæмæй арæх адæмы ма скъуырын тынг зын вæййы.
Хуыгаты Болат, шофыр: «Мæхæдæг алы бон фæндагыл вæййын. Зонын æй, куыд зын, дæ размæ куы рахизы адæймаг, уæд. Нæхимæ сывæллæтты дæр ахуыр кæнын, цæмæй куыд æмбæлы, афтæ хизой фæндаджы сæрты».
Паддзахадон автоинспекцийы кусджытæ сæ цæст дарынц фæткхалджытæм, аразынц рейдтæ æмæ профилактикон мадзæлттæ. Ацы азы райдианæй административон æгъдауæй бафхæрдтой 700 адæймагæй фылдæры. Фæлæ уæддæр, республикæйы цæрджыты фылдæр хай не ххæст кæнынц фæндæгтыл цæуыны æгъдæуттæ.
Хъамбегаты Зауыр, Паддзахадон автоинспекцийы патрулон службæйы полчъы 2-аг батальоны командиры хæдивæг: «Стыр курдиат мæм ис, цæмæй адæм ма халой фæндаггон фæтк. Куыд æмбæлы, афтæ куы хизой фæндаджы сæрты, уæд Ирыстоны уыдзæн къаддæр бæллæхтæ».
Статистикæйы бæрæггæнæнтæм гæсгæ фистæгцæуджыты архайдимæ фæндаггон фыдбылызтæ ахсынц дыккаг бынат. Сæрмагонд фæтк халынц сывæллæттæ дæр, æмæ хистæр кары адæм дæр. Фæндаггон пъæлицæйæгтæ куыд зæгъынц, афтæмæй цалынмæ адæм сæхæдæг нæ райдайой сæ цардæн аргъ кæнын, уæдмæ уавæр фæхуыздæр кæнынæн ницавæр мадзæлттæ баххуыс кæндзысты.
Хъайтмазты Дзерассæ
