Цыппар бинонтæ рæстæгмæ æрбынат кодтой, фæсарæйнæгтæн Æрхонкæйы цы сæрмагонд центр ис, уым. Иу бинонты та суазæг кодтой сæ хæстæджытæ Беслæны. Сирийаг ирæттæ алцæмæй дæр разы сты.
Цалдæр къуырийы размæ ацы адæм уыдысты Сирийы, æфсæддон цауты `хсæн. Æлбегаты Мунир йæ фыдæлты зæхмæ, Цæгат Ирыстонмæ, ссыд Дамаскæй, йæ бинойнаг æмæ йæ чызгимæ. Сирийы та ма баззад Мунирæн йæ фырт.
Æлбегаты Мунир: «Ныууагътам нæ хæдзæрттæ, нæ куыстытæ. Мах стæм ирон адæм, ссыдыстæм Сирийæ. Стыр бузныг зæгъæм республикæйы хицауадæн, ахæм уавæртæ нын кæй скодтой, уый тыххæй».
Сирийы цæры 500 ирон адæймаджы. Февралы райдайæн Цæгат Ирыстонмæ ссыдысты 12-æй. Уыдоны æрлæууын кодтой Æрхонкæйы, фæсарæйнаг гражданты рæстæгмæйы центры. Ныртæккæ дзы цæры 3 бинонтæ – Хъæбæлотæ, Бæройтæ æмæ Æлбегатæ. Сæ мыггæгты минæвæрттæ сæ бабæрæг кæнынц æрвылбон.
Бæройты Махар æмæ Солтан ныр æртыккаг хатт ссыдысты ацы центрмæ. Сæ ног хæстæджытимæ арæхдæр фæдзурынц тæлмацгæнæджы æххуысæй. Уазджытæй ирон æвзаг зонынц æрмæстдæр цалдæрæй.
Бæройты Махар, Бæройты мыггаджы минæвар:
«Ахæм зæрдæрухсæй нæм ракæсынц, æмæ цыма мæнæ сæ ныййарджытæ æрбацæуынц, æндæр гæнæн нæй, нæ къух сæм бадардтам. Махæн дæр æхсызгон у, куы сæ фенæм, уæд».
Æлбегаты 2 бинонтæ дæр фыццаг æрлæууыдысты Æрхонкæйы, фæсарæйнаг гражданты рæстæгмæйы центры. Уыдонæй иу бинонты ныртæккæ суазæг кодтой сæ хæстæджытæ Беслæнæй.
Даляль Басир(Æлбегаты): «Уырнгæ дæр мæ нæ кодта, дунейы ахæм адæм ис, уый. Ам тынг хорз цæрæм. Фæлæ нын нырма ис бирæ лыггæнинаг фарстатæ – нæй нын нæхицæн цæрæн бынат, куыст. Уазæгуаты стæм Æлбегатæм, тынг нын æххуыс кæнынц. Фæнды нæ, цæмæй нæ уавæр тагъд рæстæг сбæлвырд уа».
Сирийæ цы 12 адæймаджы ссыд Ирыстонмæ, уыдонæй 6 сты сывæллæттæ. Рæстæгмæ уал сæ ахуыр скъолаты æмæ уæлдæр ахуыргæнæндæтты ныууагътой. Ныртæккæ та сæхи ирхæфсынц чингуытæй æмæ компьютерæй. Хатгай рацæуынц горæтмæ дæр.
Хъæбæлоты Нур: «Æз Дамаскы ахуыр кодтон архитектурон факультеты, фыццæгæм курсы. Ныр мæ фæнды уырыссаг æвзаг базонын æмæ мæ ахуыр дарддæр ахæццæ кæнын Дзæуджыхъæуы».
Рæстæгмæйы центры сирийаг ирæттæ сты паддзахады æххуысæй. Алы райсом дæр сæ бæрæг кæнынц медицинон кусджытæ. Хъæбæлотæ, Бæройтæ æмæ Æлбегатæ зонгæ кæнынц сæ историон Фыдыбæстæимæ, ахуыр кæнынц ирон æвзаг.
Гугкаты Иринæ
