Гæнæн ис, æмæ Уæрæсе æмæ Ираны хсæн транзитон маршруты хай уыдзæн Цæгат Ирыстон. Скæсæйнаг бæстæимæ æмгуыстады фарстатыл Ираны посол Мехди Санаи абон ныхас кодта РЦИ-Аланийы сæргълæууæг Мамсыраты Таймуразимæ.
Гæнæн ис, æмæ Уæрæсе æмæ Ираны хсæн транзитон маршруты хай уа Цæгат Ирыстон. Скæсæйнаг бæстæимæ æмгуыстады фарстатыл Ираны минæвар Мехди Санаи ныхас кодта РЦИ-Аланийы сæргълæууæг Мамсыраты Таймуразимæ. Мехди Санаи Цæгат Ирыстонмæ ссыд знон æмæ архайдта саударæн мадзæлтты. Тæфæрфæс ракодта Мамсыраты Таймуразæн æмæ загъта, Ирыстон, раздæрау, кæй у, алы адæмыхæттытæ æнгом æмæ хæларæй кæм цæрынц, ахæм регион. Куыд бафиппайдта, афтæмæй Ирыстон æмæ Иранæн историон бастдзинæдтæ ис незамантæй фæстæмæ, æмæ сын кæнынц стыр аргъ. Фæстаг рæстæг фæсарæйнаг продукцийыл эмбарго кæй сæвæрдтой, уый Уæрæсе æмæ регионтæн фадат дæтты иннæ паддзахæдтимæ æмгуыст кæнынæн. Ираны минæвæрттæ куыд зæгъынц, афтæмæй сæ бон у Уæрæсемæ дыргътæ æмæ халсартæ ласын. Æппæтæй ахадгæдæр фæндаг та у Дайраны комыл. Уымæй уæлдай ма Иран фæнд кæны Уæрæсейæ мæнæу ласын. Цæгат Ирыстонæй та – нартхор.
Мехди Санаи ма бахаста фæндон, цæмæй ирыстойнаг сфæлдыстадон коллективтæ арæхдæр архайой Ираны культурон мадзæлтты æмæ алыхуызон фестивальты. Ныхас ма кодтой шиитаг мæзджыт сног кæныныл, æмæ персайнаг æвзаджы кабинет байгом кæныныл дæр. Ираны минæвæрттæм цымыдис кæсы æхсæвыгон кæсыны приборты арæзтад дæр. Мамсыраты Таймураз куыд загъта, афтæмæй Иранимæ культурон, экономикон æмæ зонадон бастдзинæдтæ хъæуы фидардæр æмæ парахатдæр кæнын.
Иранимæ æмгуыстады бадзырдтыл Цæгат Ирыстоны хицауады æмбырды уыд бæстон ныхас. Архайдта дзы Ираны минæвар Мехди Санаи дæр. Такъоты Сергей куыд загъта, афтæмæй Мамсыраты Таймураз профилон ведомствæтæ æмæ министрадтæн бахæс кодта лыггæнинаг фарстатæм лæмбынæг æркæсын. Цæгат Ирыстоны уæлдæр скъолаты Ираны абитуриенттæн квотæтæм гæсгæ бынæттæ куыд дæттой, уымæ дæр. Иранимæ æмгуыстадæн ис стыр ахадындзинад. Пайда уыдзæн дыууæ паддзахадæн дæр. Фæнд ма кæнынц промышленнон къабазы æмгуыстады фарстатæм æркæсын дæр. Ног маршрутыл хæстæгдæр рæстæг ныхас кæндзысты арæнхъахъхъæнджыты Федералон службæимæ. Мехди Санаи йæ фембæлдæй баззад разыйæ.
Фæстæдæр ирайнаг делегацийæн уыд фембæлд Базарадон-промышленнон палатæйы уæнгтимæ æмæ амалхъом адæмимæ. Уазджытæ дзырдтой æмгуыстады фарстатыл. Иу ирыстойнаг куыстуат презентаци скодта электрокаминæн. Бизнесы минæвæрттæ куыд зæгъынц, афтæмæй сæ иумæйаг архайдæн ис бирæ авналæнтæ. Зæгъæм, хуызджын металлурги, арæзтадон æрмæджытæ, мæнæу æмæ минералон дон.
Ирайнаг уазджытæм цымыдисаг фæкаст Цæгат Ирыстоны паддзахадон университеты рагон Аланийы музей æмæ ирайнаг культурæйы центр. Уый ис историон факультеты. Ам ма студенттæ байхъуыстой лекцимæ æмæ фыст æрцыд университетимæ æмгуыстады тыххæй меморандум. Фæстæдæр та республикон наукон библиотекæйы æвдыст æрцыд ирайнаг культурæйыл ист киноныв.
