Адæмон фронты активисттæ бабæрæг кодтой горæты 3 ахуыргæнæндоны
Хæрзæрæджы республикæйы ахуырады æмæ наукæйы министрады хъæппæрисæй скъоладзауты менюмæ хаст æрцыди ивддзинæдтæ. Хойрæгты номгъыгъд фæфылдæр, фæзындис дзы ирон чъиритæ дæр. Меню кæй рапарахат, уый домы ноджыдæр карздæр цæстдард. Адæмон фронты активисттæ бабæрæг кодтой горæты 3 ахуыргæнæндоны. Æркастысты кулинарон продукци кæм дарынц, уыцы агъуыстыты санитарон домæнтæ куыд æххæстгонд цæуынц, уымæ, цæлгæнæнтæ æмæ кусæнгæрзтæм. Адæмон фронты минæвæрттимæ скъолатæ бабæрæг кодта не сфæлдыстадон къорд дæр.
Дзæуджыхъæуы 40-æм скъолайы ахуырдзаутæн сæ райсомы хæрды меню у алывæрсыг. Ирон чъиритæ æмæ дыргътæ сæйраг хойрæгтæм сты уæлæмхасæны хуызы. Ам стыр æргом здæхт цæуы, цæмæй сывæллæттæ исой æппæт хъæугæ витаминтæ. Горæты скъолаты хойраджы хæрзхъæддзинадæн аргъ скодтой Адæмон фронты эксперттæ. Кастысты алцæмæ дæр. Уазалгæнæнты уавæрмæ, маркировкæмæ, техникон æгъдауæй куыд æххæст сты, уымæ, продукттæ кæм дарынц, уыцы агъуыстытæ санитарон домæнтæн дзуапп дæттынц, æви нæ. Хæринæгты хæрзхъæддзинад сбæрæг кæнын та специалисттæн баххуыс кодтой сабитæ сæхæдæг. Алчидæр сæ йæ хъуыдытæ загъта скъолайы хæринаджы тыххæй.
Активисттæ сæххæст кодтой сæ размæ вæрд хæстæ. Сбæлвырд кодтой менюмæ цы хойрæгты номхыгъд хаст цæуы, уый. Адæмон фронты регионалон æххæсткомы сæргълæууæг Гæлиты Клим æрхъуыды кодта йæхи рæстæджы скъолайы хойрæгты ад, æмæ йæ абарста абоны онимæ.
Эксперттæ бабæрæг кодтой 13-æм скъола дæр. Ахуыр дзы кæны 380 скъоладзауы. Уыдонæй, 120 сты кæстæр кълæсты ахуырдзаутæ. Сывæллæттæн бахæрынц, фыццаг дыууæ фæлладуадзæн рæстæджы. Сихорыл та æрбацæуынц фæкæсынхъуаг бинонты сывæллæттæ.
Сывæллæтты меню сбæрæг кодтой Дзæуджыхъæуы 28-æм скъолайы дæр. Ам хæринаггæнджытæ цæттæ кæнынц 467 адæймагæн. Специалисттæ скъолайы директоры хæдивæгимæ æрзылдысты цæлгæнæны агъуыстытыл æмæ аргъ скодтой санитарон уавæрæн, стæй хойраджы хæрзхъæддзинадæн.
Скъолатты хæринаджы мониторинджы фæлгæты профилон специалисттæ уыдысты Дзæуджыхъæуы 3 ахуыргæнæндоны. Куыд рабæрæг, афтæмæй хæрæндæтты нæ фаг кæны кусджытæ. Æппæт закъонхæлдтыты тыххæй дæр фехъусын кæндзысты цæстдарæн оргæнтæм. Активисттæ куыд зæгъынц, афтæмæй куыст снывыл уыдзæн, уый дызæрдыккаг нæу. Сæ радмæ æнхъæлмæ кæсынц районты скъолатæ.
