Хъахъхъæнæн комплекс арæзт æрцыд 17-æм æнусы
Ирыстоны хæхты цæуы ахсджиаг куыст. Сног кæнынмæ дзы архайынц Цæболты мыггаджы мæсыг. Хъахъхъæнæн комплекс арæзт æрцыд 17-æм æнусы. Ныртæккæ та дзы баззад æрмæст йæ бындур æмæ къулы иу хай. Специалисттæ, архивон æрмæджытæм гæсгæ, ныридæгæн сног кодтой проект. Рацарæзты куыстытæ хъуамæ фæуой 3 азы мгъуыдмæ. Проект ма æххуыс райста президентон гранты хуызы. Фидæны дзы байгом уыдзæн этнокультурон центр. Хъайтмазты Дзерассæйæн ныхасы бар.
Ацы рагон дуртæ хъуыды кæнынц истори, хъæуы зæххыл, цардыл æмæ фидæныл тох. Ацы бынаты сæдæгай азты размæ уыд Цæболты бинонты хъахъхъæнæн комплекс. Архивон къамты æмæ аэроæрмæджыты бындурыл специалисттæ бацæттæ кодтой проект æмæ йын ногæй сфæлдыстой йæ хуыз. Хауы йæм 17 метры бæрзæндæн хъахъхъæнæн мæсыг, 2 цæрæн арæзтады, 7 агъуысты æмæ уыцы рæстæджы сæйрагдæр сусæггонд арæзтадтæй иу – дывæр бацæуæн. Бæрæггæнæнтæм гæсгæ, комплекс хауы 17-æм æнусмæ. Хъавыдысты йæ нырма 90-æм азты сног кæнын, фæлæ къухы нæ бафтыд. Дæсгай азты фæстæ историон бынаты фæнд кæнынц цард бауадзын.
Абон мæсыгæй баззад æрмæст бындур æмæ къулы хай. Ныридæгæн цæттæ у проектон-сметон документаци. Пъланмæ гæсгæ куыстытæ адих кæндзысты 3 къæпхæныл. Комплексы фыццаградон хуыз сног кæндзысты, бахъахъхъæндзысты æппæт историон хицæндзинæдтæ дæр. Куысты фæнд кæнынц пайда кæнын уæды рæстæгмæ хæстæг технологитæй.
Фарон Цæболты мыггаджы мæсыг сног кæныны проект райста президентон грантты фонды æххуыс – 1 милуан сомы. Реконструкцийæн цы фæрæзтæ бахъæудзæн, уыдоны рагагъоммæйы иумæйаг нымæц у 15 милуан сомы бæрц. Мыггаджы минæвæрттæ куыд зæгъынц, афтæмæй уый уыдзæн этнокультурон объект. Импровизацигонд музейы алкæмæндæр йæ бон уыдзæн историйыл андзæвын.
Цæболты хистæрты ныхæстæм гæсгæ, Фыййагдоны баззад мыггаджы 2 мæсыджы. Иу дзы, зæгъæн ис, æмæ æххæстæй фехæлд. Дыууæ объекты дæр сты нæлгоймæгты моладзандоны фарсмæ. Сæрмагондæй уым райдыдта сæ мыггаджы истори. Уырдæм æрбацæуынц скувынмæ.
Ацы рагон дуртæ хъуыды кæнынц ивгъуыд. Сты нырыккон цардæн æвдисæн. Ноггонд хъахъхъæнæн комплекс та æнæмæнг у æппæт ирон адæмы стыр историйы хай.
