Йæ тæмæны ис зымæгон хъæзтыты дыууын дыккæгæм Олимпиадæ. Куыд зонæм, афтæмæй цæуы Сочийы. Зæрдиагæй йæм кæсынц Цæгат Ирыстоны спортуарзджытæ. Се хсæн æвзонг спортсментæ дæр.
Дæсаздзыд Торчынты Аланæ къахдзоныгътыл фыццаг хатт слæууыд, цыппар азы йыл куы цыди, уæд. Ныртæккæ йын хорз уайы ихыл зилын, æмæ ацы спорты хуызы æндæр элементтæ кæнын. Тæрсгæ дæр ницæмæй уал кæны. Цæгат Ирыстон рагæй хъуыстгонд у йæ хъæбысæхæцджытæй æмæ футболисттæй. Фæлæ æрцæудзæн ахæм рæстæг дæр, нæ хоккеистæ æмæ фигуристтæ дæр нæ республикæйы спортивон кадыл кад куы æфтауой. Ууыл дызæрдыг нæ кæны зымæгон спорты хуызты сывæллæтты скъолайы директор Фидараты Аслан. Йæхæдæг дæр у раздæры спортсмен, хъæбысæйхæцæг. Архайдта Атлантæйы Олимпиадæйы. Куыд зæгъы, афтæмæй стыр ныфсытæ æвæрынц сæ хъомылгæнинæгтыл, кæд æмæ нæ республикæйы Ихын Галуан байгом æрмæстдæр авд азы размæ, уæддæр. Уымæ гæсгæ зымæгон спорты хуызты традицитæн бындур æвæрд ныртæккæ цæуы. Уæвгæ Цæгат Ирыстоны стыр æргом аздæхтой хоккеймæ æмæ къахдзоныгътыл бырынмæ. Ныртæккæ æвзонг фигуристтæ цымыдисæй кæсынц Сочийы Олимпиадæйы ерыстæм. Уæлдай тынгдæр сæ зæрдæмæ фæцыд фынддæсаздзыд Юлия Липницкая æмæ Евгений Плющенко. Цæгатирыстойнаг секцийы ацы бонмæ ис 100 сывæллоны. Бирæтæм сæ ис бæллиц – Олимпаг чемпион суæвын. Фæлæ ууыл сабибонтæй фæстæмæ кусын кæй хъæуы, уый зонынц. Ныридæгæн систы Уæрæсейы Хуссар хайы алыхуызон турнирты уæлахиздзаутæ. Æмæ сæм фæзынд сæхи традици. Алы уæлахизы фæстæ иумæ фæхæрынц торт. Райсом та æвзонг фигуристтæ Дзæуджыхъæуæй абалц кæндзысты Олимпаг Сочимæ, уæрæсейаг спортсменты фарс рахæцынмæ.
