Цæгат Ирыстоны делегацимæ дзы ис стыр цымыдисдзинад, уый æндæр азты куысты хатдзæгтæм гæсгæ
Сочийы дарддæр цæуы журналистты форум. Цæгат Ирыстоны делегацимæ дзы ис стыр цымыдисдзинад, уый æндæр азты куысты хатдзæгтæм гæсгæ. Ныртæккæ форумы архайджытæ сæхи цæттæ кæнынц презентацимæ, уыдзæн райсом.
Презентацимæ цæттæдзинад ныртæккæ ис йæ тæмæны. Ам хъуамæ журналисттæ равдисой Ирыстоны цард. Фенæн дзы ис гæнах, мыггаджы мæсыг, суанг ма хъæмпимæ уæрдон. Нæ фыдæлты цард æххæстæй æвдыст цæуы Таутиаты Азæйы конд куклаты фæрцы. Форумы архайджытæ цымыдисæй æнхъæлмæ кæсынц презентацимæ, уыдзæн райсом
Регионмæ ахæм цымыдисдзинад æвзæры фароны форуммæ гæсгæ. Æмæ ныр дæр адæм æнхъæлмæ кæсынц. Районты газеттæ дæр стенды бирæ нæ лæууынц. Журналисттæ кæрæдзийæн дзурынц сæ фæлтæрддзинæдты тыххæй.
Сугъараты Елизаветæ йæ къамисæнимæ иу уысым дæр нæ уадзы. Куы ссæуа, уæд йæ уарзон газет «Размæ»-йы сæ ныммыхуыр кæндзæн æмæ Кировы районы газеткæсджытæн уыдзæн цымыдисаг æрмæг. Лизæ 10 азы кусы ацы газеты, фæлæ форуммæ ацыд фыццаг хатт.
Ацы аз Цæгат Ирыстоны делегаци форумы архайджыты канд дзыллон информацион фæрæзты кустимæ нæ зонгæ кæндзæн, фæлæ ма æмтгæй регионимæ. Равæрдзысты дзы бынæттон продукци æмæ зæрдылдарæн сувениртæ.
Ирыстоны минæвæртты хъуыдытæ презентацийы сæххæст кæнынмæ æххуыс кæнынц Сочийы цæрæг ирæттæ, сæ сæргъы Мæргъиты Анатолий. Бынæттон æмзæххонтæ фæстаг 3 азмæ сахуыр сты ацы афон сау денджызы цур ирон æвзаг ноджы парахатæй кæй ахæлиу вæййы
