Конкурсæн хатдзæгтæ скодтой форум сæхгæныны кадджын мадзалы
Хъæздыг сфæлдыстадон бынтæ Сау денджызы былæй. Сочийы нырыккон журналистикæйы форум «Æппæт Уæрæсе 2019»-æй Цæгат Ирыстоны делегаци республикæмæ ласы конкурсы 9 хæрзиуæджы. Конкурсæн хатдзæгтæ скодтой форум сæхгæныны кадджын мадзалы. Хуыздæр авторон программæйы номинацийы аккагдæрыл нымад æрцыди ПТРК-Аланийы директор, регионалон журналистты Цæдисы сæрдар Хъуысаты Тимуры проект. Национ канал «Осетия-Ирыстон»-æй не мкусджытæ райстой дыууæ хæрзиуæджы: «Хуыздæр дизайн»-ы номинацийы 1-æм къæпхæны дипломæй хорзæхгонд æрцыди телеканалы сæйраг редактор Ассир Хамоев. Жюри ма хорзыл банымадта журналист Дзанайты Альбинæйы куыст дæр. Медиапроектты конкурс «Пресс-службæты æмгуыстад нырыккон информацион технологиты уавæрты» 1-аг бынат райста Цæгат Ирыстоны Сæргълæууæджы æмæ Хицауады пресс-службæйы разамонæг Сабанты Фатимæ. Амæй размæ та конкурсы бахыгътой алы ведомствæты пресс-службæты хсæн конкурсы хатдзæгтæ. Дипломтæ райстой алы ведомствæты дзыллон информацион фæрæзтимæ æмгуыстады хайæдтæ дæр. Уыдонимæ, æнæниздзинадхъахъхъæнынады, арæзтад æмæ архитектурæйы, стæй транспорт æмæ промышленносты министрадтæ. Конкурсы хорзырдæм бафиппайдтой Æппæтуæрæсейон адæмон фронты регионалон хайады пресс-секретарь Бæдтиаты Оксанæйы архайд дæр. Равдыстыты кампанийы фæлгæты æппæты ирддæр æмæ цымыдисагдæр презентацийы тыххæй нæ делегаци хорзæхгонд æрцыди дипломæй.
