Цъæритты Олег у сæрмагонд æфсæддон операцийы архайæг, абон дæр фронты æххæст кæны йæ размæ æвæрд хæстæ
Социалон газификацийы æмæ субсидитæ дæттыны программæтæм гæсгæ Майрæмададжы Цъæритты бинонты хæдзармæ бауагътой газ. Цъæритты Олег у сæрмагонд æфсæддон операцийы архайæг, абон дæр фронты æххæст кæны йæ размæ æвæрд хæстæ. Йæ ныййарджытæн та, ныр æнæ газæй кæй нал тыхсдзысты, уый фæдыл раарфæ кодта республикæйы сæргълæууæг Сергей Меняйло.
Кърант æрзылдтой æмæ цъæх артаг бахæццæ хæдзармæ. Цъæритты бинонтæн уый у ахсджиаг цау. Газы компанийы минæвар Еленæйæн сарæзта инструктаж. Ныр йæ бон æнæ къуылымпыйæ у газы пецæй пайда кæнын.
Цъæриттæ Майрæмададжы хæдзар аразын райдыдтой 6 азы размæ. Фарон сæ фырт Олег ацыд сæрмагонд æфсæддон операцийы зонæмæ æмæ абон онг уым æххæст кæны, йæ размæ æвæрд хæстæ. Йæ фыд Валикъо куыд зæгъы, афтæмæй уый фæстæ цалцæггæнæн куыстытæ кæнын зындæр сси. Бинонтæм фæкаст республикæйы разамынд æмæ компани «Газпром межрегионгаз Владикавказ».
Уый къухы бафтыд социалон газификацийы программæйы фæрцы. Æххæстгонд цæуы 2021-æм азæй фæстæмæ бæстæйы президенты хæслæвæрдмæ гæсгæ Федералон æмбырдмæ ныстуаны хатдзæгтæм гæсгæ. Бинонтæ ма систы, субсидитæ дæттыны республикон программæйы архайджытæ. Компани «Газром межрегионгаз Владикавказ» лæвар бауагъта газы хæтæл Цъæритты хайы арæны онг, 100 мин сомы бæрц субсидийы руаджы та бантыст, монтажон куыстытæ скæныны æмæ газы ифтонггæрзтæ балхæныны хæрдзтæ баххæст кæнын .
Ацы ахсджиаг цауы фæдыл Цъæриттæн раарфæ кодта республикæйы сæргълæууæг Сергей Меняйло. Уый загъта, Цæгат Ирыстон газификацийы программæ æххæст кæнынмæ гæсгæ, кæй ис бæстæйы 10 хуыздæр регионы хыгъды.
Абон республикæйы газификацийы æмвæзад у 95 проценты. Сергей Меняйло газы компанийы разамонæгæн раарфæ кодта ахадгæ æмгуыстады тыххæй, æмæ загъта, иумæйаг куыст дарддæр æххæстгонд кæй цæудзæн. Цъæритты бинонтæн та скодтой зæрдылдарæн лæвæрттæ.
2 азмæ газы компани цъæх артаг бахæццæ кодта 1880 хайæ фылдæры арæнтæм. 1100 абоненты онг ныридæгæн баиу кодтой сæ хæдзæрттæ газмæ.
