Ахсджиаг контракттæ æппæтæй фылдæр бафыстой Æрыдоны районы
Социалон контракттæ зынгæ фæбæрæг сты, хи куыстуат кæмæ ис, ахæм амалхъом адæмы архайдыл. Ахсджиаг контракттæ æппæтæй фылдæр бафыстой Æрыдоны районы. Абоны онг дзы æххуыс райстой 209 адæймаджы. Программæ æххæст кæнын райдыдтой 2 азы размæ. Фаронимæ абаргæйæ, ацы аз курдиæттæ фæфылдæр сты. Программæйы архайыны сæйраг домæн – фæкæсынхъуаг бинонты статус райсын. Бæлвырддæр хабæрттæ радзурдзæн Тъехты Элинæ.
Бутаты Зæринæ адæмæн лæггад кæны рагæй. Ателье йæм ис, фæлæ дзы хъæугæ фæрæзтæ та нæ уыд. Йæ зонгæтæй æхсæнадон контракты тыххæй куы базыдта, уæд хъæугæ гæххæттытæ сымбырд кодта æмæ курдиат балæвæрдта. 6 мæйы фæстæ йын цы хцайы фæрæзтæ радтой, уыдонæй йæ ателье фестырдæр кодта. Ныр æм ис ног хуыйæн машинæ, стæй, кæй зæгъын æй хъæуы, адæм дæр æм фылдæр цæуын райдыдтой.
Бутаты Зæринæ, хуыйæг: «Мæ зонгæтæй бирæтæ бацархайдтой уыцы программæйы æмæ йæ æз дæр уыдонæй базыдтон. Хъæугæ гæххæттытæ æрæмбырд кодтон æмæ мæ курдиат балæвæрдтон. Программæйы фæстæ мæ куысты фадæттæ бирæ фæхуыздæр сты».
Æхсæнадон контракт арæзт у фæкæсынхъуаг бинонтæн. Æхцайы фæрæзтæй ис куыд хи бизнес бакæнын, афтæ ног куыстмæ бацæуын дæр. Хъесаты Изабеллæ бакодта хи бизнес. Ныр йæ хæдзары ис гæрзтæхсæн. Уыцы хъæппæрис æм фæзынд рагæй, уымæн æмæ Æрыдоны ис бирæ алыхуызон куыстуæттæ, гæрзтæхсæн та нæй – зæгъы Изабеллæ. Программæйы руаджы йæм ис, гæрзтæ чи хус кæны, ахæм машинæ æмæ бирæ æндæр кусæнгæрзтæ.
Хъесаты Изабеллæ: «Куысты фадæттæ нын нæ уыд. Зымæгон дзаумæттæ кæм хус кæнæм уый нын нæ уыд æмæ программæйы руаджы балхæдтам хусгæнæн машинæ, иту æмæ æндæр хъæугæ дзаумæттæ. Æвзæр боныхъæд дæр нæ куыстыл нæ ахады».
Джыккайты Алан канализацийы конструкциты куыст рагæй кæны, фæлæ йын хъæугæ фæрæзтæ кæй нæ уыд, уый тыххæй йæ куыст ныууагъта. Программæйы тыххæй куы базыдта, уæд бизнес-пълан скодта æмæ йæ курдиат балæвæрдта. Æхсæнадон контаркты руаджы ногæй йæ куыст кæнын райдыдта. Куыд зæгъы, афтæмæй уый у хъæугæ программæ æмæ хорз уаид, ахæм программæтæ фылдæр куы уаиккой, уæд.
Джыккайты Алан: «Мæ хо кусы Æрыдоны районы цæрджыты куыстифтонг центры. Хæтæлæй мæм æрбадзырдта æмæ программæйы тыххæй радзырдта. Æз дыккаг бон ацыдтæн æмæ анкетæ балæвæрдтон. Рæстæг куы рацыд, уæд нæм къамис æрбадзырдта. Бузныг зæгъын нæ хицауадæн ахæм программæтæ кæй кæнынц æмæ адæмы кæй хъуыды кæнынц, уый тыххæй».
Программæ йæ тыхы бацыд дыууæ азы размæ. Фаронимæ абаргæйæ ацы аз курдиæттæ фæфылдæр сты. Уымæ гæсгæ хъавынц æхсæнадон контрактты фæрæзтæ фæфылдæр кæнын.
Кæд фарон программæ æххæст кæнынæн рахай кодтой 150 милуан сомы, уæд ацы аз ныхас цæуы 220 милуаныл.
Æхсæнадон контракттæ æппæтæй фылдæр бафыстой Æрыдоны районы. Абоны онг аххуыс райстой 209 адæймаджы. Программæйы алы архайæджы сæйраг домæн – фæкæсынхъуаг бинонты статус райсын.
